Akken i d-teḍra twaɣit n ubrid i d-yellan ttlata iɛeddan deg tlemmast n temdint n Xerraṭa, anida yedhem ukamyun aẓayan ukuẓ n tlawin n yiwet n twacult, tberreḥ tenmehla n Uḥuddu Aɣarim n Bgayet s wulɣu ideg i d-tewwi ugar n yisallen ɣef tedyant. Ɣef wakken i d-uran, ssebba n usehwu-a i yeglan s 4 n terwiḥin, icudd ɣer uḥebbas yeqqersen n ukamyun-nni. Mi as-yerwel dɣa i unehhar, yufa iman-is yeẓdem ɣef ugraw n tlawin deg uneḥbus n yisakacen (bus) n Xerraṭa. Ad d-nesmekti d akken win yellan deffir ubaxix seg Sidi Ɛic, yesɛa 34 n yiseggasen. Mi yeḍra wayen i d-yeḍran, yerza dindin ɣer lkumisarya n Xerraṭa. S wakka i yewweḍ leḥsab n wid yemmuten deg yiberdan n Bgayet segmi i yekcem useggas-a n 2017, ɣer 40 n yimattanen.
M. K.