Ugar n 15 n wussan segmi i d-yeffeɣ udlis-nniḍen amaynut i tsekla taqbaylit, ɣur Teẓrigin El Amal n Tizi Uzzu. Talallit n tikkelt-a ur telli n tmedyazt, n tullist neɣ n wungal, maca, d tin n usegzawal n tenfaliyin tiqbayliyin i yesɛan assaɣ akked tfekka n umdan s umata. Ula d azwel yefren-as-t umeskar-is Mass Muḥend Mehrazi, ad yili akka: “Asegzawal n tenfaliyin tiqbayliyin yerzan tafekka n umdan: tizumla d tgensas”. D adlis i yettawin 475 n yisebtar, iɣef rsent azal n 2200 n tenfaliyin n temnaḍt n Leqbayel, ttwarunt s yisekkilen n temɛemrit. Ma d tasuqilt-nsent, tettwaxdem ɣer tefransist. Nnig waya, ula d asegzi n yinumak n tenfaliyin-nni, ad t-yaf yimeɣri deg usegzawal. Muḥend Mehrazi, mmi-s n Tizi Uzzu, aselmad n tutlayt tamaziɣt deg tesdawit n Tubiret, niqal yessaẓreg-d yakan kra n yidlisen. Gar-asen amawal n tudsa d tussniwin n umeslay (Lexique de la didactique et des sciences du langage) d usegzawal n tgezmi tafransist-tamaziɣt (Dictionnaire d’électrotechnique français-berbère), d wiyeḍ. Tikkelt-a mi d-yessufeɣ asegzawal-a iɣef yebda iqeddec deg useggas n 2007, iban yumer ayendin mi yessamed ccɣel-is. « Tutlayin merra sɛant isegzawalen. Ula d tamaziɣt ilaq ad ten-tesɛu. Ttwaliɣ tutlayt-nneɣ tedda asurif ɣer sdat, meɛna mazal-as aṭas n yisurifen. S leqdicat n warraw-is ad ternu ad taẓ. Nekk iswi-iw d asnerni n tmaziɣt… Ssarameɣ ihi asegzawal-a n tenfaliyin, ad t-aɣen medden akken ad kkin ula d nutni deg usnerni-s ». I aɣ-d-yenna umeskar. Tiɣin n udlis-a, ad tili teshel i yimeɣri, imi yettnuzu di yakk tinedlisin n tmurt s wazal n 1000 n yidinaren.
Kaisa Khalifi