Ahat wwḍen d igiman n yimdanen i d-yerran i tiɣri ssebt n ddurt yezrin deg Uweqqas, akken ad lḥun ɣef tlelli n umeslay d useḥbiber ɣef yidles. Wid akk yeččuren iberdan usan-d seg waṭas n temnaḍin n Tmurt. Akk-nsen ɛewwlen ad inin i udabu: « uhu i uḥbas n yidles, uhu i tmenɣiwt n udlis ». Gar yiberriḥen (slogans) i refden dɣa yimekkiyen, ad nɣer: « Awit idrimen, ǧǧet-aɣ-d idles », « Ma nsusem ad aɣ-mḥun », atg. Ilmend n tigawt-a, aṭas seg yimeḥḍar i yeddan adlis deg yifassen-nsen, imi aberriḥ n tikli yella: « Afus deg ufus, adlis deg ufus ». Ma nesmekti-d ayen i d-yewwin tanekra-a yeddukklen n ugdud, d agdal n wacḥal d asarag i d-tettheggi Tdukkla Azday Adelsan n Uweqqas yal ddurt. Aneggaru-is d win n umaru-amaẓrag Remḍan Ɛeccab i niqal ad d-yawi awal ɣef liḥala n usiẓreg n udlis amaziɣ, maca ugin-t s tekriḍt yinesdabuyen idiganen. D ayen dɣa i yeǧǧan medden iɣaḍ-iten lḥal ula akkin i yilel. Yal wa ibeggen-d ibeddi-ines akked yimheggiyen n temlilit taseklant n Uweqqas.
M. K.