Nnger n yiɣersiwen, aṭas-aya tura segmi d-yebda deg Tferka n Ugafa. Imi mazal latarat i d-yeskanayen belli ula d izem d waytma-s, llan nuḥen meqrub Ilel Agrakal. Wanag ass-a deg wussan-a, ma nekkes wid i d-yettrebbi umdan deg uxxam, drus maḍi n yiɣersiwen i d-mazal deg lexlawi. Ad d-nebder seg-sen uccen, ilef, ifker, awtul n lexla, inisi, ifis, azirdi d kra-nniḍen. D acu, ayen i d-ijebbden tiṭ tallit-a taneggarut, d amek i d-yesnulfa umdan ssenɛa swayes ara yessenger s wudem arusrid iɣersiwen-a; yuɣal yettnadi-ten anda nuḥen yesseqdac-iten di leḥruz. « Tikkelt iɛeddan nufa tama uxxam-nneɣ yiwen n yifker neṭṭef-it-d. Nebɣa ad d-nekkes aqeclum-is ad nbexxer yes-s. Qqaren-d yelha aṭas i tukksa n wayen yellan diri-t ». Akka i aɣ-d-tenna yiwet n teḥdayt seg Ayt Smaɛel. D abrid-a ihi i yefren umdan akken ad ineɣ s uɛemmed iɣersiwen-a i simmal ttfakkan. Kra n win ara yerzun ɣer ugezzan, neɣ ccix, ad as-d-yettwacreḍ uɣersiw, ilaq dindin ad t-id-yaf ɣas s waṭas n yidrimen. Ladɣa imi ula deg leswaq, tikwal ttilin yiɣersiwen-a i win yebɣan ad ten-yawi i leḥruz. Dɣa deg Bgayet, yal mi ara d-ibin uɣersiw seg tikkelt ɣer tayeḍ i wallen n umezdaɣ, ladɣa ifker d yinisi i isehlen i tuṭṭfa, dindin ad t-yeḥzeq d ameḥbus deg uxxam. Di leɛḍil ad d-yaweḍ wass-is. Ɣas ma yella inisi tuɣ tetten-t kra « ɣef teksumt-is taẓiḍant » akken i d-qqaren, ass-a yettruḥu s ṭṭaqa d asfel i ubexxer am uɛeqqar. Ma yella nebɣa ad aɣ-d-qqimen kra n yiɣersiwen d inaragen (lǧiran), yessefk ɣef yinesdabuyen idiganen (autorités locales) ad d-gen asaḍuf ara iḥudden ɣef yiɣersiwen-a ineggura.
M. K.