Ddurt-nni yezrin i d-bannen yigemmaḍ ineggura n temsizwert-agi n tmedyazt, ha-t-an ihi amek myezwaren yimedyazen-agi: Mass Boualem Mohand Arezki deg umḍiq amezwaru s tezmilt n 14,33, deg umḍiq wis sin d Mass Djoudi Fahem s tneqiḍt n 14,16, ma d amkan wis tlata tewwi-t Massa Taarkout Kassa s wazal n 13,83, deffir-s kan yella Mass Sikadir Belkasem s tezmilt n 13,33. Ad d-nesmekti belli timsizzelt-agi n tmedyazt, thegga-tt-id tiddukkla tadelsant “Smaɛil Azikiw” n taddart n Tewrirt n War, yettabaɛen ɣer tɣiwant n At Ziki, akked waṭas n yimsuddsen-nniḍen gar-asen: Tasqamut n taddart Tawrirt n War, Asqamu aɣerfan aɣiwan n At Ziki, Asqamu unnig n timuzɣa, Tanmehla n yidles n lwilaya n Tizi Uzzu, Axxam n umezgun amniḍan Kateb Yacine, Asqamu aɣerfan n lwilaya n Tizi Uzzu. S tallelt n waṭas n yimallalen n tɣamsa yecban: aɣmis n “La Dépêche de Kabylie”. Heggan-d akk yimsuddsen-agi tazrigt tis ukuẓ n tfaska taɣelnawt n tmedyazt tamaziɣt “Smaɛil Azikiw”. D timsizzelt i d-yellan gar 10 alamma d 12 deg waggur-agi n ɣuct ideg nella, deg taddart n Tewrirt n War yettabaɛen ɣer tɣiwant n At Ziki. Aseggas-agi, gan-tt d tajmilt i yiwen umedyaz ameqqran n tama-agi n At Ziki, wagi d Dda Lounis Azzi, yettwassnen s umennuɣ-is s ttawil n tikta d yisefra ɣef yidles d tmagit tamaziɣt. Am wakken, daɣen, ara d-nesmekti belli, d tafaska taɣelnawt n tmedyazt tamaziɣt, imi tiwwura-s ldint i yal amedyaz amaziɣ. Ttilin yimedyazen s tantaliyin yemxalafen, yecban: tacawit, tamẓabit, tatergit… Ma d ahil, yella-d d anesbaɣur ɣef teɣzi n 3 wussan, imi i d-tella deg-s temsizzelt n tmedyazt, ccna, isefra berra n temsizzelt, amezgun, isaragen, timussniyin ɣef tudert Smaɛil Azikiw akked Mass Lounis Azzi i wumi tuɣal tejmilt aseggas-agi, isenza s ubuddu n yidlisen, timsikniyin n yidlisen…atg.
Ghani Amazigh