Imezdaγ n Tewrirt tazeggaγt i d-yezgan deg tγiwant n Leɛğiba, mmugren s lferḥ asenfar n usiweḍ n waman seg ubarağ n Tilesdit γer taddart-nsen. Lecγal yebdan yakan deg wussan-a ineggura, rran-d asirem i yimezdaγ yettidiren taswiɛt qessiḥen seg lixsas n waman, imi lbir yettwaxedmen i taddart-a yegguma ad d-yelḥeq ayen i ssuturen yimdanen imi azγal n unebdu-a, ur yeğği ara aman ad d-ilin s waṭas. Iwulem ad d-nesmekti d akken taddart-a, tezga teccektay yal mi ara d-yaweḍ unebdu, imi d tallit ideg i d-yettban lixsas n waman almi i ssawḍen deg useggas yezrin ad suγen akken ara d-slen yimdebbren ahat ad d-tili tifrat i uγbel-nsen. Tikkelt-a, d tiddukkla n taddart i yemlalen akked yimḍebber n Ddayra n Beclul i wakken ad as-ssiwḍen aγbel-nsen. D timlilit i d-yewwin igemmaḍ, imi tuffγa γer unnar n yimḍebber-a akked srabes yella yid-s, tessaweḍ γer beddu n lecγal n usenfar n usiweḍ n waman seg ubarağ n Tilesdit. Ayen yerḥan s waṭas imezdaγ n taddart-a, d akken abarağ-a d win i d-yezgan γer tama-nsen, mi akken wid ibeɛden sfaydan acḥal d aseggas-aya seg waman. γef leḥsab n wamek i teddun lecγal, asenfar-a d win ara yekfun uqbel taggara n useggas ideg nella, ayen ara yeğğen imezdaγ n Tewrirt Tazeggaγt ad yekfu fell-asen lḥif n usiweḍ n waman s tsitirnin yerna s ssuma γlayen.
S. M.