Karim Ferkane, neɣ MuḥKarim Ferkane s yisem n tẓuri, d amedyaz i yettɛeggiḍen s usefru akken ad yessiweḍ izen-is. D mmi-s n Bgayet, i d-yekkren deg temnaḍt n Uqbu. Newwi-d deg tdiwennit-a kra n wawal. yid-s
Aɣmis n Yimaziɣen: Amek iga wassaɣ yellan gar-ak d tmedyazt ?
Karim Ferkane: Assaɣ yellan gar-iw d tmedyazt, zemreɣ ad d-iniɣ amzun d win yuḍnen yufa ddwa i waṭṭan-ines! Acku, segmi bdiɣ smedyizeɣ, (seg tagara n 2008 ar ass-a), ḥulfaɣ dakken ttifsuseɣ seg tɛekmin i yi-yesbubben wussan di yal aḥric n tudert-iw, akked tmetti tuzligt i yeffeɣ sswab d teqbaylit s umata. Tamedyazt ɣur-i d asafar n tujjya i wul d wallaɣ. Akken diɣ i tettuneḥsab tmedyazt d iles n tudert s umata (d tumert neɣ d amerret). Ɣef waya zemreɣ ad d-iniɣ d ddwa-inu! Ufiɣ fell-as! Tekkseɣ-d ayen i yi-yerḥan! S usefru i ntettru. Wamma iẓri-nneɣ yekkaw yakan.
Ɣef tmuɣli-k, deg tmurt-nneɣ acimi ur ttakken yimdanen i usefru azal i yuklal ?
Asteqsi-a wis sin a weltma Kaysa, aṭas i d-yeqqnen ɣur-s. Mačči ɣas d asefru kan iwumi ur ttakken azal di tmurt-nneɣ. Nekk ad d-iniɣ taẓuri s umata ur tufi iman-is. Acku sseddayen-tt yir ifassen, s lebɣi n udabu. Limer i yufa ur d-yettaki ugdud seg naddam-ines alqayan… Ssebɣasen deg wid i irennun naddam i wallaɣ, akked uhuzzu n wammas! Rnu, tuget n ugdud ur ɣur-s idles n tɣuri (n tmedyazt neɣ n wayen-nniḍen). Limer i trebḥeḍ ay ul talfi amedyaz ad t-tafeḍ d lmezwer n tmetti, ad sellen medden i tiɣri-ines d yiwellihen-is.
Tbaneḍ seg wid i yessefrayen s waṭas ɣef wayen i iceɣben allaɣ d wul. Ɣas tikwal s uɣiḍi, tikwal-nniḍen s zzɛaf, maca deg tmedyazt-ik ur tebriḍ i usirem. D acu ara d-tiniḍ ɣef waya?
D tidet. Yella waya i d-tenniḍ. Acku ayen i yi-d-yesneṭṭqen seg tazwara d zzɛaf d unnuɣni, d leḥzen ɣef waddad-nneɣ s umata d wayen akk i d-yeḍran yid-i sɣur wid i yi-d-yezzin. Dɣa, ttlallen-d yisefra d usriden wa deffir wa, ɣef idra n yal taluft neɣ tadyant i aɣ-iḥuzan. Ama d tid i yuran fell-aɣ, tid i nura s yifassen-nneɣ, neɣ ula d tid i uran yimdanen-nniḍen ad zrint fell-aɣ (d ccer).
Dɣa nettqabal-itent s tebɣest, imi tudert-a s lekmal d amennuɣ. Ihi yessefk ad nili d inazbayen, yerna ad nleqqem asirem a weltma Kaysa. D aɣan (d lwajeb) fell-aɣ. Txeddmeḍ tamedyazt tudmawant, i yiman-ik kan?
tamedyazt-inu mačči d tudmawant, i yiman-iw kan. Ɣas llan kra n yisefra d udmawanen, ttbuḥruyeɣ yis-sen nekk d yiman-iw kan, ulayɣer ad asen-slen wiyeḍ, neɣ ur bɣiɣ ara maḍi ad asen-slen. Acku d nekk kan i asen-yettḥulfun: rzan iman-iw. Maca tuget n tmedyazt-inu, terza timetti-nneɣ di yal aḥric, u terza
Amek tettwaliḍ tamedyazt deg tsekla taqbaylit?
Ayen yerzan tasekla s umata, ad naf d tamedyAzt i d llsas-ines. Ɣef waya yelha nezzeh ɣef yimura n tsekla ad sseqdacen di tira-nsen tugniwin n usmedyez i wakken ad gerrzent tira-nni. Ma d tasekla taqbaylitt, tuget ad tt-naf d ammuden n tmedyazt ugar n yiḥricen-nniḍen. Nessaram simmal ad yettnerni uswir n tsekla taqbaylit di yal taɣult.
Tanemmirt ɣef wayen i d-terriḍ a Mass Karim. Awal-ik n taggara…
Tanemmirt tameqqrant a weltma Kaysa ɣef tdiwennit-a i yi-txedmeḍ. S rrezg i d-rriɣ ɣef yisteqsiyen i d-tefkiḍ. Tanemmirt i Uɣmis n Yimaziɣen.
Testeqsa-t Kaisa Khalifi