Mačči kan ala aṭṭan n uxenẓir i iweɛren i udawi deg tmurt. Ula d aṭṭanen-nniḍen i d-yettbanen zun d ifessasen, yuɣal yewɛer ad ten-tdawiḍ akka imir-a deg waɣir n Bgayet. Ugar n yiḥeyyaren i sɛeddayen yimuḍan seg lehlak-nni-nsen, ttidiren iɣeblan-nniḍen akken ad afen tazeqqa n udawi i walmend-nsen. Syin ad d-ṭṭfen ttiɛad ara ten-yeǧǧen ad gganin ayyuren deg tiqraḥ send tirza n usɛeddi. Amedya n waṭṭan n ubeḥri n yiɣsan d uzellum, ttmagaren-d yimezdaɣ n twilayt n Bgayet, ladɣa asamar-is, uguren d imeqqranen akken ad afen amsujji iqerben seg tnezduɣt-nsen, neɣ sɣur win ara d-sɛeddin war ma urǧan nnuba n waṭas n wayyuren. Iban-d mačči kan beɛden yimsujjiyen n waṭṭanen-a ɣef Wat usamar n Bgayet, am Ayt Smaɛel, Tasexriwt d Yiderginen, maca daɣen uqan ayendin sdat umḍan ageɛmir n yimuḍan n waṭṭan-a i yettziden yettahda. « Ṭṭfeɣ-d ttiɛad seg Uqbu, maca ilaq-iyi ad rǧuɣ sin n wayyuren d uzgen akken ad ɛeddiɣ. Ur nesɛi ara tiferni-nniḍen, wamma tili nefren win i aɣ-iseɛɛden ». D awal n yiwet n tmeṭṭut seg Ayt Smaɛel. Mi ara yili waṭṭan deg uswir i d-yessuturen adawi uzrib, tuget n medden i nesteqsa smenyifen amsujji abujad iqerben, wala win yettwassnen ibeɛden. D acu, ugur a-t-an ur ttwassnen ara yibujaden i yeddawayen aṭṭan-a neɣ wa. « Nekk s timmad-iw ssneɣ ḥaca yiwen n umsujji i yeddawayen aṭṭan-a. D win i yettwassnen, d win iɣef ttmeslayen lɣaci seg waṭas-aya ». I aɣ-d-yenna yiwen n urgaz. Ulamma ggten ttawilat n teywalt, am yiẓeḍwan inmettiyen, mazal ttɛeṭṭilent kra n telɣa akken ad awḍent i uɣerman. Rnu d tigejdanin maḍi, ma nsenneḍ ɣef umedya-a n tezmert n umdan d udawi-ines. Ugar n uraǧu iḍulen armi yenfel ssber, ula d ass n usɛeddi ur yelli d ushil ɣef umuḍin n tɣiwant n Ayt Smaɛel d tɣiwanin i as-d-yezzin. Ɣas ma d tagrest i d-iteddun tura, ideg yettili usemmiḍ tettɛeṭṭil tafat n tnezzayt, yessefk ɣef umuḍin ad d-yekker ɣef zik lḥal i tisin deg yiḍ i wadeg yeggugen, ma yebɣa ad d-yeqḍu aqeddic-is akken yessaram.
M. K.