Ɛni taluft-a tetturaǧu ad tili seg waṭas d aseggas-aya, imi dɣa i d-yeggra umaḍal yeḥsel deg unnerni s tazzla n yiguda seg useggas ɣer wayeḍ. Seg wannect-a, ɣas ma tal taɣiwant deg Tmurt n Yezwawen tesɛa aɣilif-a yesnuzgumen n uhicur ed uḍegger-nsen, maca llant kra n temnaḍin, kra n tuddar, kra n tɣiwanin ideg i d-iban wugur-a yesmeḥḥin xilla ugar n tiyaḍ rnu ibeddel tudert n yimezdaɣ akken ur tt-ssaramen maḍi. Amedya n ugudu n tdayra n Uweqqas i d-yezgan azal n 22 n yikilumiṭren seg waɣir n Bgayet, llan dɣa wid i as-yessawalen «agudu n lɛib», seg wakken yuɣal iseggasen-a ineggura d aqqa aberkan n Uweqqas ucbiḥ. Ameslay ɣef ugudu-ya drus-as ahat kra n yijurriḍen, imi ilsawen llan qqaren, mazal ttinin ur kfin. Amek uhu netta mara d-yaweḍ yiwen anda yettwaḍeggar ugudu-nni n Uweqqas sdat n teftist, ur yezmir ad n-yeǧǧ deg ubrid zziǧan n tkerrust ldin ma ulac ad d-yerr iẓerman-is, ma neẓra belli lfuḥa neɣ taziffurt i d-yekkaten syinna d tin i ur zmiren ad qeblen yinzaren, aniɛad amdan anehhar, aḥewwas neɣ amerray. «Yal mara d-awḍeɣ deg umḍiq-nni anda ttnejmiɛen yiguda sgumaɣ ad qableɣ almi meddleɣ ṭṭaq tikwal. Nessaram ad as-d-afen yimḍebbren tifrat s uɣsab». I aɣ-d-yenna yiwen n yilemẓi anehhar ɣef taluft-a.
Ula d wid n Suq Letnin ceɣben iɣermanen
Ma yella ayen yessefqiɛen deg ugudu n Uweqqas d lfuḥa-nni i yettcabin ɣer tegnit n yimelyan n yimurdusen, tin n tɣiwant n Suq Letnin yella ucettki fell-as ladɣa seg wayen i d-tettawi srid d timḍerrit i twennaḍt : imi seg tikkelt ɣer tayeḍ mara sserɣen wid terza taluft iguda-ya, mačči kan d tiqraḥ ay d-rennun i ugama yellan din, maca daɣen d ddiq n twennaḍt i ssimɣuren. War ma nesha acewwel i d-yettwanulfayen i at tikeryas i d-yettɛeddayen syinna, deg leǧwahi n Yiderginen, mi d-ttafen abbu annect-ilat deg ubrid n tikli. D tidet, ur nuḥent ass-a waṭas n tbuda (solutions) tama n umdan, maca yewwi-d tili imasayen (responsables) ɛerḍen xersum ad suddsen tilufa, ad qeɛden iqeddicen n ujmaɛ ed tukksa n yiguduyen-a.
Mhenni Xalifi