Yella umdan d azuran, yella wayeḍ d amirqiq. Maca, llan yimdanen i ikerhen lqedd-nsen, ttcedhin deg tfekkiwin n wid ur ten-necbi. Seg zik i yettwassen waddal d ccɣel i yessenqasen lmizan i win iɛebban aṭas n uksum, yebɣa ad yifsus. Si zik daɣen i ssugguten wid iḍeɛfen asebleɛ n tgella akken ad sɛun tacriḥt, ad rnun deg taẓayt. Dɣa, ma nmuqel ɣer tallit n wass-a, ad naf amur ameqqran n medden smenyifen ad d-banen d izuranen i ikesben aksun, wala d imuḍɛifen. Abeɛda tilawin i yettwalin tezher-nni tettak-d ccbaḥa i wudem d tfekka. Ɣef waya i zgant ttnadint amek ara xedment bac ad jjint, ad asent-tettwakkes terqeq i yuɣalen s tmuɣli-nsent d lɛib neɣ d aɣwes. Taggara-a, mi d-nnulfant ddwawi i d-ixeddmen tezher i tfekka s lemɣawla, neɣ s unamek-nniḍen tid i yescuffuyen aksum n yiwen neɣ n yiwet, ladɣa tiḥnakin n wudem, d ferru n uɣilif i d-ibanen ɣur kra n yimdanen i nezmer ad d-nini ahat ttsetḥin s lqedd-nsen amirqiq, ttrummun iman-nsen. Aṭas n wid i yesseblaɛen ddwawi-nni, i d-yettekcamen seg tmura tiberraniyin, am Ɣana, i yellan d uzzil neɣ d tiɛeqqacin, war ma ẓran d acu-tt temḍerrit i d-ttaggent. Ɣas ma ur ttnuzunt tura deg tensafarin imi ur tent-id-ttarun yimsujjiyen i wid irezzun ɣur-sen, ulamma ttilint kan deg tḥuna n usenzi n yiḥcicen d yiɛeqqaren, maca ttɛemmiden ad tent-id-aɣen, yerna s leɣla, akken kan ad cuffen tifekkiwin-nsen. « Nekk mgal tid d wid i itetten ddwawi n tujit. Sliɣ yis-s, ẓriɣ tesnulfay-d qeddac n waṭṭanen i umdan. Ssarameɣ ad ttwaḥebsent tiɣin-nsent, acku ɣas ma tazwara tessefraḥ, meɛna taggara tesseqraḥ ». I aɣ-d-yenna yiwen d Asmaɛli. Ad yeqqim ihi umihi yettabeɛ kra n tin neɣ n win i yettawin ddwawi-nni ɣer yiɛebbaḍ, i yeṭṭfen deg rray-nsen nutni, ugin ad ḥessen i wiyaḍ send ad asen-ifat ahat lḥal.
Kaisa Khalifi