D taddart Tiferdud i yewwin amḍiq amezwaru n “Temsizzelt n taddart zeddigen” Aissat Rabah, deg tedwilt-is tis 5, i d-yettheggi, yal aseggas, Usqamu aɣerfan n lwilaya n Tizi Uzzu.
D tajmilt i d-as-yettuɣalen i Rabaḥ Aissat yal aseggas s temsizzelt i d-yettilin akken ad tt-ttwafren taddart i zeddigen. Deg tezrigt n useggas-a, ttekkant 78 n tuddrin. Ffɣen-d yigemmaḍ n temzizelt ddurt iɛeddan deg yiwet n tmeɣra deg Uxxam n yidles n Mulud Mɛemmri anda i ḥedren aṭas n yemdan. Tḥella-d taddart Tiferdud, taɣiwant n At Yusef di Miceli, amḍiq amenzu, syin d taddart Talbent di tɣiwant n Zekri. Ma yella d amḍiq wis kraḍ, yuɣal i taddar Ibekkaren di tɣiwant n At Wizgan. Tazrigt n useggas-a, temgarad d tid iɛeddan imi 8 n tuddrin i wumi i d-issaḥ warraz. Arraz amenzu d idrimen s lqidar n 8 n yimelyan n yidinaren, syin wis ssin azal n 7 n imelyan n yidinaren, wis krad 6 n yimelyan, ma yella d arraz wis ukkuz i yuɣalen i taddart n Mhaga (idjeur) s 5 n yimelyan, amḍiq wis semmus tiwi-t taddart n Leɣrus (Meqlaɛ) s 4 n imelyan, ma yella d tuddrin n Ḥura, Izaouin d tiɣilt n Mḥend tigi isaḥ-itent-id 3 n yimelyan .
Yettwaxdam usebdad i Rabah Aissat deg tɣiwant Ɛin Zawiya
Am yal aseggas, mi ara d-yaweḍ 12 deg wayyur n tuber, taɣiwant n Ɛin Zawiya tesmektay-d tamettant n mmi-s n taddart-nsen. 11 n yiseggasen-aya segmi i yettwanɣa uselway n tɣiwant n Ɛin Zawya, Rabah Aissat, i yellan, diɣ, d aselway n Uqamu aɣerfan n lwilaya n Tizi Uzzu (APW). Ddurt iɛeddan, tuɣal-as tejmilt di tɣiwant-is. Ar ass n wassan, ur d-iban kra ɣef temsalt-a. Tuɣal-as tejmilt sɣur uselway amenzu n ukabar n FFS, imḍebbren n ukabar-a, aselway n tɣiwant akked mmi-s n Rabaḥ Ɛissat. Am wakken i ḥedren daɣen waṭas n iwudam-nniḍen i d-yusan akken ad t-id-smektin. Yal yiwen, yefka-d awal-is ɣef urgaz yettwanɣa. Aya, yeḍra-d mewed mi sersen tamuqqint n yiseǧǧigen ɣef uẓakka-s u bedden dqiqa n tsussmi ɣef terwiḥt-is. Yenna-d yiwen seg yimḍebbren n ukabar n FFS : “Aissat rabaḥ d argaz ara tafeḍ di yal taswiɛt mi ara t-teḥwiǧeḍ , yella d amedya yecban Dda L’Hocine, Ali Mécili d waṭas n wiyaḍ, yal aseggas, nettas-d akken ad d-nesmekti tamettant-is. Ur ilaq ra ad ten-nettu “. Ɣer taggara, mi kfan awal, xedmen-as asebdab di tmeqbert n tɣiwant-is i lmend n 11 n yiseggasen seg wasmi i yettwanɣa.
S.Yamani