I lmend n usebɣes n yinelmaden n useggas amenzu n uɣerbaz alemmas Lɛerbi Mezzani, i d-yufraren deg tmaziɣt s ugemmuḍ yekkan 7,5/10 asmi llan deg useggas wis 5 n uɣerbaz amenzu, ihegga-asen-d Ugraw n tsekla « Tira Tura » tirza ɣer Bgayet. Wid d-iheggan tirza-agi, qudden s kra ilaqen, ssafessen tirza ɣef yinelmaden. Akka i rzan, ass-nni n 20 tuber 2017, ad merḥen yerna ad issinen imukan ur ẓrin ara yakan. Bdan abrid-nnsen ɣef 6 n sbeḥ. Deg ubrid yakan, ittbeddil ugama am wakken ttbeddilent tfelwin n temsikent. Seg tjuṛ, ɣer teẓgi, ɣer lebḥer, am wakken d-walan, diɣ, iddawen mi wwḍen ɣer teẓgi n Yiɛekkuren. Syin, d abrid srid ɣer Bgayet, acu kan sḥassfen aṭas yinelmaden imi ur yelli ara yifri yettwasnen s yisem “La grotte n leqsur”. Kkemlen ɣer “les cascades”, dɣa din i ten-yeṭṭef lawan n yimekli. Ččan, nnecraḥen, uɣen-d ismektiyen, ṭṭfen-d ttsaweṛ. Limer ur ifut ara lḥal, tili ad awḍen, ad d-issinen taqerrabt n “Yemma Guraya”. Maca s yin i d-uɣen abrid n tuɣalin. Ssaramen ad uɣalen, ad ttefɣen am tikelt-agi, acku yeɛǧeb-asen aṭas lḥal. Snemren daɣen s waṭas Agraw Tira tura i asen-d-iheggan tirza-agi, imi sɛeddan ass igerrzen.
Zakur Ɣnima