Ddurt-agi, yella-d gar-aneɣ d docteur Kamel Dine Fekhar wawal ɣef wayen i iḍerrun di Tɣerdayt. Ɣef liḥala i ttidirent yimẓabiyen lawan-a, yenna-k, : “akka, tura, ters-d cwiṭ n lehna. Maɛna mačči d tin ara idumen. Dɣa, iḍelli(ass n tlata) i kren i yiwen seg-neɣ di ssuq”.
Yir taswiɛt ttidiren yimẓabiyen icudd-tt docteur fehkar s adabu. Amek? iwala belli karuh (d awal racisme i d-yenna) mgal imẓabiyen ileqqem-it u yeṭṭef-as afus udabu. yefka-d yiwen umedya bac ad d-yesbin karuh “institutionnel” : “yiwen n limam di ljameɛ yessawel i ljihad mgal imẓabiyen”. Yettwali Fekhar belli ayen akk d-yellan, ar tura, bac ad d-ters talwit di tɣerdayt mačči akk d ayen ara yessufɣen ɣer lehna, imi akken yeqqar lemtel “yuḍen wezger qden aɣyul”. Tifrat yettwali-t di tlalit n tugdudt taḥeqqanit d yizerfan n wemdan. Ad ner tamawt belli, ar ass-a,” tijemmuyaɛ n lxir” i irezzun ɣer Tɣerdayt gellunt yid-sent s wawal n Rebbi d aɛwin, ɣas ulamma mačči d tadiyanit i tifrat, ladɣa imi deg tamsalt n ddin ulac d acu ara yelmed Umẓabi. Ɣef yinejmuɛen d-yellan s demma i ubeddi tama n Yimẓabiyen , ladɣa di tmurt n leqbayel, yenna-d: “yella wayen yessefraḥen, yella wayen yesseqraḥen. Nefreḥ imi bedden ar yidis-neɣ izzayriyen, nesḥassef imi ḥala atmaten nneɣ imaziɣen i nufa tama-nneɣ. Dɣa ad farseɣ tagnit bac ad snemreɣ imaziɣen anda ma llan”
Ɣef lebɣi n timanit, i sbabben, kra n yisertiyen i yimẓabiyen, yenna Fekhar belli tamsalt-a u telli ara, maca yettwali daɣen tifrat deg udem nniḍen n leḥkum. Udem nniḍen n leḥkum ara yefken azal u ad yebnu ɣef yimgirden yellan gar temnaḍt d tayeḍ, di tmurt n Lezzayer.
S. O. A.