Larebɛa yezrin, yettunebeg-d Racid At Ali UqasiI, aselway n Tiregwa (Tasebddit Takanadit i Tmaziɣt), ɣer tesdawit Akli Mohand Oulhadj n Tubiret. Tirza n uneɣmas ar yinelmaden d yisdawiyen tella-d d tagnit, i wakken ad d-yawi awal ɣef umecwar akked d yiswiyen n Tiregwa.
Yufrar-d deg wawal-is belli s umata tlul-d tsebddit takanadit i wesnerni d iccan n yidles d tutlayt tamaziɣt. Tasebddit tebna tlata yeḥricen i twala ad ssedunt timsal : Isenfaren, isaragen d tejmilin.
Yal aḥric s lqima-s, maɛna azal n yisenfaren yugar-iten. Ayagi akk ur d-ttas ara kan akka : aṭas n tedrimt i tehwaǧ taluft.
D acu kan, xas ulamma , akken s-yenna win “lecɣal n taddart meqqrit nukni mezziyit», Racid At Ali Uqasi d yimeddukal-is ttafen iberdan n tifrat. Ɣef temsalt-a i wekked-d belli d tezdeg n yiɛeggalen n Tasebddit d tiqqa i gan deg-sen lɣaci i d-yettawin.
Deg temlilit, awal yettawi-d wayeḍ, almi d-yufa iman-is yinebgi n Tubiret yerfa ɣef wid i izemren, ur xdimen. Xas ulamma adabu i ban webrid-is, iwala Racid belli ula d timeti taqbaylit tefka afus, tebra i ṭṭbel deg waman.
Iwalla belli aṭas n temsal i isehlen ad tent-nexdem ur nebegges ara ɣur-sent. Yefka-d amedya n tilibizyu u yenna-k d lewhayem amek wigi akk i izemren u sɛan tadrimt ur d-sbedden ar tilibizyu ara d-yelhun s tmeti tamaziɣt !? Aya qqaren-s s teglizit d tefransist “lobby”. Lobby-agi am akken ara d-iniḍ d tarbaɛt i i jehden s yidrimen-is d yimekwan teṭṭef di tqucac n udabu (taɣamsa, tasertit, tadamsa…) . ljehd n terbaɛt-a yesseday timsal almend n wayen i wala inefeɛ-it u yenfeɛ agdud-is. Deg temsalt-a n usenfeɛ n wegdud ad d-yufrar, lobby n wudayen: d takemmict maɛna s tedrimt nnsen d imekwan ṭṭfen sselḥayen ddunit akken bɣan. Ɣur-neɣ tella tedrimt, llan ula d yimekwan, maɛna ulac targizt : lebɣa ad nnil.
Yesbegen-d daɣen lɣiḍ-is ɣef wigi akk ur nesselmad ara i tarwa nsen taqbaylit u mmsemyafen ad sen-slemden tafransist. Tawaɣit-agi i icudden ar wayen i wumi qqaren s tefransist “la haine de soi” i wala-tt Racid d sebba n nnger. Taluft-nniḍen uɣur d-yewehha d lewhi, d udem-agi “folklorique” i la nettak i tmaziɣt.
SOA