I lmend n usmekti wis 63 n umenzu n tnekra n tegrawla n 1954, tiddukkla tadelsant Amaynut akked tejmaɛt n lɛuqqal n taddart n Tzaɣart, iteddun ɣer tɣiwant n Yiɣram, heggan-d yiwen n leqdic s wazal-is anda ara naf timsikent, awal ɣef umezruy, tulya s wudem unṣib n temkerdit n taddart. Di tazwara, yella-d usterḥem ɣef yimeɣrasen n tegrawlan s usrusuy n tmuqint n yijeǧǧigen d dqida n tsusmi di tmeqbart. Syin akin yettunefk wawal i umjahed aqdim Omar At amar i d-yulsen cfawat-is. Yewwi-d awal s telqey ɣef wasmi tebda tegrawla n 54, yenna-d :’’Deg yiseggasen-nni imenza, imjuhad ur d-ttqerriben ara ɣer taddart, drus yid-neɣ i neɛlem, nettawi-asen tagella i lmujahdin ɣer berra n taddart. Aseggas mbaɛd, ussan-d yimḍebbren n FLN Amirouche d wiyaḍ, xedmen-d lxeṭba di tejmaɛt, ferqent tseqquma: 10 n taddart, ad ddun d yimjuhad, wiyad ad ilin d lmuseblin, ad qedcen di taddart, ad ɛiwnen. Seg yimir-n i ẓran akk medden yebda umennuɣ mgal acengu afransis…”. Am wakken i d-mmeslayen kra n yimjuhad ɣef umennuɣ i d-yeḍran deg udwar n yiɣram ddaw taddart n yiɛemmuren deg unebdu 1958. Ɣef wanect-a, dɣa, i d-yemmeslay umjahed amyaru n umezruy Djoudi Attoumi deg udlis-ines ɣef umezruy n n lwilaya 3. ɣef lewhi n 11h30, tella-d tulya n temkerdit n taddart d yiwet n tzeqqa n usenselkim i lfayda n yilmeẓyen n taddart : ‘’ Tamkerdit n taddart-agi yeldin ass-agi, d asirem n yal amezdaɣ, nettraǧu-tt s ccuq, imi taɣuri d ajlal n tmussni, d tafat n umdan , adlis d amawanes. Nessaram s temkerdit-agi, ad nezraɛ yis-s tikti n tɣuri di yal axxam, wa ad d-nzarreb i yigerdan d yilmeẓyen n taddart-nneɣ ɣef yir iberdan d wayen i asen-d-igellun s lemḍerra’’, i d-yenna Mass Belkacem Fenniche d aselway n tdukla Amaynut. Tameddit n wass maḍi, yekfa leqdic s usenɛet n yiwen n usaru i d-yettmeslayen ɣef umennuɣ n tilawin n taddart di tegrawla n 54.
B. Benhamouche