Amsebrid yewweḍ s aḥdid akken qqaren. Ur yelli d uffir, takebbanit taɣelnawt n trisiti ed lgaz n tmurt n Lezzayer (Sonelgaz) teɛreḍ tisent (lmelḥ) dɣa teɛfes tiliset n tferka n yiɣermanen (citoyens). Lḥasul seg Suq n Letnin i da ladɣa, imezdaɣ ɛeyyan deg ubdar n wawal « Atrisyan » almi i t-ɛuffen. Seg wannect-a tella sebba, nuɣal neḥḍer i tallit anda irgazen-a i iqedden i tkebbanit-a taḥukumit qqlen d iɛeṭṭaren neɣ ugar, am akken ḥemmlen kra n medden ad asen-semmin, uɣalen d iɣulla (espions). Anda ma terriḍ deg yizenqan n tuddar-nneɣ ad d-temlileḍ yiwen ad as-tiniḍ d aɛessas n tseɣliyin . Ussan-a kan, deg tfakturin tikraḍyurin n lexlas i d-yeffɣen, aṭas n wawal i yuzzlen ed ufqaɛ ay d-yellan deffir, dima seg tama n ugdudan (acaɛbi) i tent-iɣerrmen weḥd-s. Deg tfakturin-a ihi tban-d tukerḍa ɛinani, akken yella deg uslagan (règlement) yettwasres-d belli imsaɣen (clients) n tkebbanit-a ad ttxellisen tazwara seg wayen ččan lqidar n 125 kW ɣef ssumma n 1.779 n yidinaren i yiwen n ukiluwaṭ, ma d ayen yernan nnig ad yettwaḥsab s ssuma n 4.179 n yidinaren. Maca mačči d wa i d-yeḍran tikkelt-a, imsaɣen ufan iman-nsen ttuḥettmen ad xellsen 83 kan kW s ssuma n 1.779 n yidinaren i ukiluwaṭ, ayen nniḍen merra yettwaḥseb s ssuma n 4.779 i ukilu. D ayen i yeǧǧan imsidren (consommateurs) ttafgen ttrusen seg yir aqeddic-a. Ɣas ma llan wid ur nfaq i wayen i asen-yemuggen neɣ ur as-fkan azal aṭas ɣef tsebba neɣ tayeḍ. Llan wiyaḍ ɛewwlen ur bran i ṭṭbel deg waman alama i d-yuɣal uzref-nsen, ɣetsen (ont décidé) ad rren ma ulac maḍi i teɣdemt (la justice) i yellan d taɣsert (étape) taneggarut. « Ma mačči d lbaṭel ed tukerḍa wannect-a ur yelli d kra ihi, amek ara ad xellseɣ ɣef ssuma n 1.779 DZ i ukiluwaṭ ḥaca 83 n yikiluwaṭen netta yewwi-d lḥal 125, ma d ayen yernan meɛlum seg zik, nettxellis-it s ssuma n 4.779 DZ i ukiluwaṭ » i aɣ-d-yenna yiwen n umsider i ifeqɛen almi dayen kan, send ad d-yernu: « ansi yebɣu yekka-d wannect-a, nekni s yisem-nneɣ d imsaɣen ur nettqil ara lbaṭel wayeḍ nnig win yeḍran fell-aɣ yakan ». Ɛlaḥsab takebbanit-a taɣelnawt n trisiti ed lgaz, annim-a yusa-d segmi i d-suffɣen tifakturin send lawan, send ad mmden 3 n wayyuren. D wa i d assefhem i d-tefka i yiɣermanen yerzan ɣef uxxam n Sonelgaz deg Xerraṭa bac ad sizedgen tilufa deg yixfawen-nsen ed ad gzun amek almi. Ad d-nerr kan awellih dakken mačči ala aya ay d-yekkan d ahewwel seg tkebbanit-a wanag daɣen ula d iqeddacen i d-tettceyyiɛ i umuqel deg yimesḍanen (ikunturen) n yixxamen, « itrisyanen » akken i asen-ssawalen medden, uɣalen yal ass ɣef wanwa ara d-rzun, ad ssawalen sdat n tewwurt n tnezduɣt netta ala tameṭṭut i yellan din skud irgazen d ixeddamen, rnu ad d-suturen lexlas n tfakturt netta werɛad yewwiḍ wazemz (date) aneggaru n uxelles. Daymi i aɣ-d-yenna umsaɣ nniḍen: « seg lqanun-a ajdid (asaḍuf amaynut) i d-suffɣen, nwan ad kksen lḥerma ɣef yixxamen-nneɣ, nek dima tellfeɣ-ten ttaniɣ-asen: tella Sonelgaz deg Xerraṭa ad nemḥasab dinna ». Taluft ar tura tesbek, yettusemma ur tɛedda ur tefra, ma llan-d yisallen imaynuten ad awen-ten-id-nessiweḍ dima deg uɣmis-nwen, amɣis n yimaziɣen.
Mhenni Xalifi