Tella-d ass-nni n letnayen 30 deg waggur n tuber 2017, yiwet n temlilit n usileɣ i yiselmaden n tutlayt tamaziɣt, yesɣaren deg yiɣerbazen ilemmasen yellan deg ladayrat-agi Wagennun, Meqleɛ, Tizi Raced, Iferḥunen, Buzgan akked kra n yiselmaden yessɣaren deg kra n yiɣerbazen ilemmasen n ladayra n Tizi Uzzu. Tannant-agi n usileɣ n yiselmaden-agi, tella-d sɣur umaswaḍ n tmaziɣt Mass Ɛerqub Ɛebdellah akked Massa Ḥallit Nabila d taselmadt n tmaziɣt deg uɣerbaz alemmas, imi nutni gar wid ittekkan deg yidlisen-agi n tsuta tis snat. Deg uɣerbaz alemmas Derdar Saɛid, ideg i d-tella temlilit-agi n usileɣ tamenzut i useggas-agi aɣurbiz 2017-2018, s lmendad n umaṣwaḍ n tmaziɣt deg lwilaya n Tizi Uzzu, Mass Ɛerqub Ɛebdellah, tebda temlilit-agi ɣef 09h00 n ssbeḥ, tekfa ɣef 15h00 n tmeddit. Am wakken daɣen i tella temlilit-agi, s lmendad n Mass Yeḥya Bellil s yisem-is ula d netta d amaṣwaḍ n tmaziɣt deg Bgayet. Tannant-agi n usileɣ n yiselmaden n tmaziɣt yessɣaren aswir wis sin akked wis kraḍ n ulmud alemmas(aɣerbaz alemmas), acku d wigi i teɛna temsalt n yidlisen ijdiden. Tedda temlilit-agi ɣef teɣzi n wass, seg 09h00 n ssbaḥ alammi d 12h00 n uzal, yella-d deg-s usqerdec n wawal akked usenked n yidlisen imaynuten n tmaziɣt n tsuta tis snat, wigi d adlis n useggas wis sin (2AM) akked udlis n useggas wis tlata (3AM). D Massa Ḥallit Nabila, i d-yefkan tasebḍut n useggas iɣef ddsen yidlisen-agi. Tezwar-d s win n uswir wis sin d win n uswir wis tlata. Syin yettunfek-as wawal i Mass Bellil, i d-isfehmen aṭas n tlufa i icudden ɣer yidlisenfusen-agi, ladɣa tignatin n usuffeɣ-nsen, dɣa yenna-d: “Adlisfus, d allal n unelmad mačči n uselmad, ur nezmir ara ad d-nefk deg-s kulec neɣ ayen yerzan aselmad, imi anect-a yettili deg umnir n uselmad”, yerna yenna-d: “Idlisenfusen-agi, d yiwet n tɣuri seg tɣuriyin n wahil n tsuta tis snat, s tarrayt tamaynut n tneɣlaft n usegmi aɣelnaw”. Ma ɣer taggara n wawal-is, yenna-d: “Deg uselmed n tutlayin tiyemmatin, tira tezwar asenfali s timawit, ihi ilaq ad nessnerni tizemmar n yinelmaden deg tira”. Syin ɣer-s, fkan awal i Mass Ɛli Lewnis, i d-imeslayen s waṭas ɣef wawalen imaynuten akked yiḍrisen imaynuten yellan deg-sen. Ula d Mass Ɛerqub Ɛebdella, yesseḥres deg yiselmaden i wakken ad ssumren tikta timaynutin imi d nutni i yellan deg unnar, d nutni i yeẓran acu i d asen-ilaqen i yinelmaden-nsen. Yenna-d belli tuget n yiḍrisen yellan daxel-nsen, d imura izzayriyen i ten-yuran, ula d ismawen n yiwudam n yiḍrisen akken ma ttmalan d ismawen imaziɣen, yeqqnen ɣer yidles d umezruy-nneɣ. Dɣa s wurrif, yenna-d: “Ur ẓriɣ ara ayɣer ttwalin wiyaḍ belli idlisen-agi, ur wulmen ara i tsuta tis snat, imi s kra n yiwellihen i d-yettunefken sɣur tneɣlaft n usegmi, llan akk daxel…”. Ma ɣef 11h00 n uzal, yebda uskasi d yiselmaden ɣef temsal-agi iɣef i d-wwin awal yimaswaḍen-agi akked yiselmaden-a, am wakken daɣen i d-jebden tamsalt n uktazal n yinelmaden akked uxeddim-nsen. Tuget n yisteqsiyen i fkan yiselmaden, rzan ahil yellan deg yidlisen-agi, ssutren daɣen i wakken ad tili temlilit am tagi i lmend n uktazal n yihalen-agi imaynuten, imi ɣef leḥsab-nsen, ɣer taggara n useggas i nezmer ad nẓer ayen yelhan deg-s d wayen ixuṣṣen. Dɣa deg tmuɣliwin i d-fkan ɣef yihalen-agi ijdiden, llan yiselmaden iwumi ɛejben llan wiyaḍ ur d asen-ɛjiben ara maḍi. Ad nesmekti kan belli, d timlilit i ḥedren wazal n 80 n yiselmaden n tmaziɣt, am wakken daɣen i t-id-iwekked Mass Ɛerqub, ad d-ilint temliliyin n usileɣ sya ɣer sdat, gar-asent tin timawit d usenfali s tira, tin yilugan imaynuten n tira…atg.
A. A.