Kra n wussan kan send ad ḥebsent ddiɛayat n lvuṭ, ttkemmilen wat ikubar tirza-nsen ɣer tuddar i temlilit n yimezdaɣ. Deg tɣiwant n Ayt Smaɛel dɣa, xemsa n yikubar i d-ibedden i tefranin tidiganin. Wigi d RCD, FFS, RPR, RND d FLN. Yelha ad d-nesmekti d akken seg 2005 d FFS i d-iberzen deg-s. Akabar n Ugraw i Yidles d Tugdut ad yeqqim yettnaɣ ulamma ugar n 20 n yiseggasen ur yeṭṭif tisura n tɣiwant deg Ayt Smaɛel. « Nesɛa yiwen n wahil i ubeddel asertan deg Ayt Smaɛel. Ala agdud i d ljuj awḥid. Skud tasertit ur d tussna tusdidt, numen nezmer ad d-nerbeḥ ikursiyen n tɣiwant. Ula d leqder, s anda nerza yezga yella ». D awal n Nabil Xaldi, wis sin deg wumuɣ n RCD. Ma yella d taɣiwant taǧaret, Tasexriwt, ahat amḥizwer gar wumuɣen i d-yersen i tefranin-a tidiganin n twilayt n 23 unbir ɣer umur ameqqran n yikersiyen, ad yili am yal tikkelt gar RCD d FFS. Ulamma deg ɛecra n yiseggasen ineggura d RCD i d-yettḥellin tuget n tuɣac i uselḥu n temnaḍt-a tamazrayt n Tsexriwt. Ma nessuk-d awal ɣef tɣiwant n Yiderginen, i yellan d tadayra daɣen, ad naf d akken amezruy-is iqerben n tefranin-a, yeqqen ɣer ukabar n Taj seg 1997 armi d 2007, syinna d FFS i d-yettawin rrbeḥ armi d tura. Tamawt i yewwi-d ad d-nger d lɣiba n ukabar n RCD deg tɣiwant-a aseggas-a, imi llan kan xemsa n wumuɣen deg-s: FFS, RND, FLN, TH d TAJ.
Ɣef tefranin n twilayt deg Bgayet
Akkin i twilayt, i lmend n tefrarin-a n 23 unbir, sersen yikaramen-nsen (dossiers) i tikkin 14 n yikabaren. Dɣa usan-d akka deg wumuɣ i aɣ-d-yewwḍen: FFS, Ilelliyen (Lwaḥi ad nebnut imal), RCD, ANR, RND, PT, MEN, FLN, PST, Ilelliyen ( Azwur Aɣerman), MPA, HMS, Tadukkli TAJ Akked FM. Tura akka yal yiwen yesseqdac tasertit-is deg ddiɛayat i wakken ad as-d-siḥent tuget n tuɣac.
M. K.