Ulamma iɛeṭṭel ugeffur, ur d-yewwit ara, ayen yeǧǧan kra n tuddar kkrent ad ttrent Anẓar, kra n tdukkliwin ssutrent ɣer tẓallit.
Dɣa, armi d ussan-a yezrin i d-tebra tegnawt i waman-is ɣer tmurt. Maca taɣelyawt n lehwa-nni, tesnerna-d uguren, imi d-iban d akken imesdabuyen idiganen (les autorités locales) ur heggan ad qablen tagrest i d-iteddun, ara d-ikecmen seld kra n wussan kan. Ma nemmeslay-d ɣef wuguren i d-yellan, ad d-nebder ayen yeḍran ass n 6 deg wayyur-a n unbir, mi tuɣal temdint n Bgayet ad as-tiniḍ d tamda, neɣ d ayen icuban ilel. Imi qeflen yiberdan deg-s, ur ufin yinehharen amek ara ɛeddin. Llan ttwaḥezqen, ttuḥettmen ad beṭṭlen lexdami, ad ǧǧen lecɣal-nsen, llan daɣen wid iɛeṭṭlen deg tekcumi s ixxamen skud menɛen-asen waman i d-yettfeggiḍen seg tregwa ad bellzen tikli. D aɣilif i yeszeɛfen aṭas lɣaci, ladɣa imi nezmer ad d-nini yekka-d seg ustehzi. Imi yewwi-d tili deg unebdu yezrin i temmug lḥemla n usizdeg n tregwa d tqenṭrin n Bgayet i yettawin ageffur i wakken ass-a ur d-yettili wayen i d-yettilin. Ladɣa ma neẓra belli aql-aɣ ɛad deg tsemhuyt n umwan, wammag ccetwa taqesḥant urɛad tebdi. Mazal lehwa d yiḥemmalen imeqqranen seg duǧember d asawen. Aya ɣas d urrif ara d-yeg i yinehharen, maca daɣen d anezgum i t-ttɛebbin yimezdaɣ n temdint n Bgayet. Ma yella d imezdaɣ n tudrin, ɣas anezgum-nsen mačči d igeffuren skud zedɣen deg yidurar, maca d lexsas n ttawilat n useḥmu i ilan d aɣilif. Ladɣa ma neẓra d akken ula d ideflawen ttaṭṭafen-iten-id seg yennayer ɣer furar abeɛda. Amedya deg tɣiwant n Ayt Smaɛel, ur zmiren ad ttun yimezdaɣ ayen sɛeddan merra d iḥeyyaren deg tegras iɛeddan. Mi ara d-yewwet udfel ur ttaffen abrid ulamma ad d-awin taqerɛet n lgaz. Ulamma d asenfar n lgaz n lḥiḍ (gaz de ville) yeqqim ccɣel-is d azgen, akken qqaren: ‘’Izu-tt armi d tidmert, yeǧǧa-tt’’. Imi taɣiwant n Ayt Smaɛel ur tesɛi tadrimt swayes ara stemmed ayen i d-tebda. Ilaq ihi ad rǧun alamma ɛeddant tefranin n twilayt n 23 unbir i d-iteddun akken ad yettwakemmel usenfar. Ad yettwassemed leqdic n yijeɛbuben-nni i yettmaggan ddaw tmurt, i yettwaxedmen deg waṭas n tuddar, maca mazal tiyaḍ. D ayen i ilaqen ad yettwammag, imi tallit tbeddel. Acku zik zeddmen-d medden seg tẓegwa isɣaren i ukanun, ma d tura aṭas n leɣwabi i iruḥen. D ayen yesḥissifen ama i umdan neɣ i ugama. Ma d uguren-nniḍen i d-ttmagaren deg tɣiwanin n Ayt Smaɛel d Tsexriwt, d isyaxen n yiberdan i d-yettilin deg cctawi, am winna i d-yeḍran iseggasen yezrin deg Uneqquc, mi yegzem ubrid acḥal d ussan.
Kaisa Khalifi