Sylvie Vieville, ansuf yes-m ɣer tmurt n Leqbayel, di tazwara senɛet-d iman-im i yimeɣriyen n uɣmis n yimaziɣen ?
Tazwara azul i tmurt n Leqbayel, tanemmirt tameqqrant i usnubget-nwen ɣer tfaska iwennan “Racontes-arts”. Nekk usiɣ-d si tmurt n Fransa, tamdint n Marseille. D tanaẓurt, hekkuɣ timucuha, daɣen d tasezruft (comédienne). Sεiɣ zzher akken ad xedmeɣ taẓuri, ɣef waya i d-usiɣ aseggas-a ɣer temdint n Wehran ilmend n tfaska “Ameɣri ameẓẓyan”. Si tama-nniḍen, sεiɣ zzher iwakken ad d-ruḥeɣ ɣer tmurt Leqbayel i tikelt tamenzut.
Tzemreḍ ad aɣ-d-tefked asmekti ɣef umecwar-inem di tẓuri ?
Amecwar-inu di tẓuri d tamacahut meqqren, nekk d tasezruft ɣur-i 25 yiseggasen deg unnar n tẓuri.
Amek i d-tufiḍ Tamurt n Leqbayel ?
D tamurt i yettakken azal i yinebbgi aṭas, tesεam tamurt tecbeḥ nezzeh s yidurar-is d lhawa-s, rnu imdanen-ines lhan aṭas.
D acu i tessneḍ deg tẓuru taqbaylit ?
tidet kan, ilmend n tfaska iwennan “Racontes-arts”, i bdiɣ sukkuseɣ-d ayen zegleɣ acḥal-aya deg tmurt n Leqbayel, yerna deg waṭas n yiḥricen.
D acu i d iwellih-inem i yinaẓuren imeẓẓyanen n tmurt n Leqbayel ?
Ad-wessiɣ inaẓuren imeẓẓyanen n tmurt n Leqbayel akken ad kemmlen deg ubrid n tẓuri s tebɣest ɣas llan wuguren, akken ad naweḍ s umata ɣer yiwen n yiswi.
Seg wasmi d-tewwḍeḍ ɣer dagi, ar taddart n Wizgan, acu n wuguren i d-temlaleḍ ?
Ulac uguren, mi d-wwḍeɣ ɣer unafag agraɣlan n Lezzayer tamanaɣt, ufiɣ-d imdanen ttrajun-iyi, syin wwin-iyi-d srid ɣer taddart n Wizgan, lḥasun tajmilt-nsen d tameqqrant.
Awal-im n taggara ?
Ah, awal-iw n taggara, sarameɣ taẓuri ad tesεu amḍiq-is deg ddunit. Daɣen, tanemmirt i uɣmis n yimaziɣen ɣef tdiwennit-agi.
Yesteqsa-tt Islam Bessaci