Xas ulamma yuẓ deg leɛmer, imi ha-t-an nnig n 80 n yiseggasen deg tudert-is, meɛna, aya, ur yelli d ugur i wayen iḥemmel d wayen i swayes i d-yekker ucennay Hadjloum Mohammed Said n taddart n Trihant tama n Boudjima. Xas armi i meqqer i yebda yesseklas, acu kan temɣer ur as-tessenɣes deg lebɣi n ccna akked uqesser s ugabar. Deg taggara-a, qrib yal aseggas, ad d-yessufeɣ album ajdid. Mebɛed mi yessekles deg useggas 2016 album iwumi yefka azwel ‘’Lɣerba’’ anda llant 6 n tezlatin i d-yewwin ɣef waṭas n yisenrtal yecban Lexla, Tin ɛzizen, yegguma wul, Lɣerba, Ttruḥun, Aqcic anda yesseqdec kra n uẓawan yemmalen ciṭ ɣer ccaɛbi, aseggas-a 2017, yuɣal-d s album amaynut s uzwel ‘’Arraw n leqbayel iḥruren’’. Yessekles-d 5 tezlatin i yexdem netta ama seg tama n wawalen neɣ seg tama n uẓawan. Tizlatin i d-yettmeslayen ɣef yisental yemxalafen i d-yessers ucennay ɣer unnar i wakken ad d-yefk fell-asen tamuɣli-s nreɣ iwellihen-is imi netta yettuneḥsab gar tsuta timezwura n ccna aqbayli. Tizlit tamezwarut iwumu isemma ‘’Arraw n leqbayel’’, yerra deg-s tajmilt i yimeɣnasen n tmaziɣt s umata. Yettwessi, diɣ, tisuta i d-yettnekkar i wakken ad ḍeffren abrid n yimezwura-nsen. Tis snat, tewwi-d ɣef yir awal i yettilin gar yimdanen, neɣ tiyita n wa deg wa akked usemɣer n yiman ɣer kra n medden. Yal tazlit, tettili-d tezwert s umaslay, tettak-d tikti ɣef uḍris n tezlit s umata. Tizlit tis rebɛa, d tajmilt i yiwen gar sadat i yellan seg tama-agi n Wagennun, wagi Sidi Boubekeur. Yesmak-d amek yella d wamek i d-rezzun ɣur-s wid-nni ihelken, ṭṭalaben deg-s ḥellu. Am wakken i d-yesban azal-is deg tmetti taqbaylit imi d izgaren i as-ttawin wid i t-yettzuren, ɣef wakken i d-yeqqar. Ula d netta, Hadjloum Mohammed Said, yessuter deg-s i wakken ad -tyerr ɣer lǧennet. Deg taggara, yessegra-d ccna-as s yiwet n tezlit n tayri iwumi isemma ‘’Tenniḍ-iyi-d, nniɣ-ak’’. D tizlit anda i yecna ɣef tayri n yiwen n teqbaylit tuzyint i imenna ad tt-yesɛu. Xas ulamma iḍal deg leɛmer, acu kan mazal ul-is d aleqqaq. Yekfa album-is s yiwet n terbaɛt n yiḍebbalen degtmeɣra.
Farida Elharani