Am wakken i yettuɛeggen,tifranin n yiseqquma n tɣiwanin akked twilayin ɛeddant ass n lexmis yezrin deg tegnatin n liser, mi akken tadbelt tsers gar yifassen n yimezdaɣ n Tubiret akk ttawilat ilaqen. Amḥizwer s akersi yeǧǧa atas n yikabaren d lejridat tilelliyin ad d-kecmen ɣer tazla i wakken ad d-ḥellin ahat imukan deg yiseqquma. Ma nezzi-d akka tamuɣli, ɣer lejridat n tɣiwanin, ulac anda ara naf ddaw n semmus seg-sent. Segmi i tebda ddiɛaya ass n 19 deg waggur ideg i nella, ulac taddart, neɣ ahat azrib yeqqimen ur yethewwel ara ama s tewlafin neɣ s yinejmuɛen. Inawen bnan akk ɣef lebni, lxedma, leɛdel almi ula d wid yellan deffir kra n lexsarat uɣalen-d s wudem d amaynut amzun akken acemma ur yedri. D acu kan, yella akka wayen yessefrahen, imi ayen akk i tekka ddiɛaya n tefranin-a, ur d-yelli kra n cwal ɣas ulamma yeḥres wurar. Ass n lexmis yezrin, kra n wayen akken yellan deg tasilt yessali-t-id uɣenja, imi uqbel azgen n yiḍ, igemmaḍ banen-d. ɣas ulamma ɣef uqerru n twilayt ur d-yelli kra yessewhamen, imi am akken i tuɣ Tubiret tannumi, d sin-nni n yikabaren FLN akked RND i d-yettilin d imenza s 14 ar 15 n yimekwan, d tiɣiwanin ideg i d-yella kra n ubeddel. Ddayra n Bechloul ikesben 5 n tɣiwanin yufrar-d deg-sent ukabar n Ahmed Ouyahia deg 4, d ayen dɣa i d-yedran i tikkelt tamenzut. Taɣiwant n Lesnam i yellan deg ufus n RCD seg 2005 tikkelt-a tenneqlab ɣer RND mi akken Leɛǧiba yezzi-d ɣur-s ukabar-a iwumi yettwakkes leḥkem seg 1997. Ma d akabar n FFS, yessaweḍ ad d-ihelli 6 n tɣiwanin. Iwulem kan ad d-nesmekti d akken tikkelt-a, taluft-nni n tefranin n 2012 ur d-telli ara, imi asaḍuf yedher, iban d win i d-iḥellan aṭas n leswat ara yilin d lmir. Dɣa d ayen ur d-nettaǧǧa ara lhem gar yimdanen.
Smail. M