Taṣebḥit n wass-nni n lǧemɛa 1 deg waggur n duǧamder 2017, wehmen akk yimezdaɣ n lwilaya n Tizi Uzzu, i iruḥen ad d-awin aɣrum ufan-t yewweḍ ɣer 15,00 Da i yiwet n tbagiṭ, mebɛed mi yella ixeddem ala 10,00 Da. Timerna-agi, tusa-d mi d-llan sin n yinejmuɛen n tiddukkla taɣelnawt n yimsenziyen d yinḍan (ANCA) i d-yellan akka; ass-nni ttlata 28 unbir 2017, tella-d temlilit n uniraw aɣelnaw n ANCA akked wid i tt-yettmetilen deg 67 n tɣiwanin n lwilaya n Tizi Uzzu, akked wid i tt-yettmetilen deg 48 n lwilayat n tmurt. Azekka-nni n larebɛa 29 deg unbir 2017, tella-d temlilit n wid yettmetilen ixebbazen (wid yesewwayen aɣrum deg lkucat) n 48 n lwilayat, akked tdukla n yixebbazen n lwilaya n Tizi Uzzu. Msefhamen i wakken ad qqadren iwellihen i d-yeffɣen deg temlilit tamatut i d-yellan ass-nni n ttlata 28/11/2017. Iwellihen swayes i d-ffɣen deg timlilit-agi d wigi; timerna n ssuma n uɣrum s wazal n 5 n yiddinaren i tbagiṭ, asenqes deg lmizan s wazal n 50 n yigramen, am wakken daɣen axebbaz ad isenz aɣrum i bab n tḥanut s 14 n yiddinaren. Ixebbazen akk n lwilaya n Tizi Uzzu, msefhamen i wakken ad qqadren leqwanen-agi, dɣa dayen i xedmen seg umenzu n waggur-agi ideg nella. Dɣa ɣef wannect-agi, yenna-aɣ-d bab n yiwet n tḥanut deg tɣiwant n Ait Aissa Mimun: “ Ur d-wwiɣ ara aɣrum deg wussan-agi ssebt, lḥed akked letnayen, imi ur teffiɣ ara felli tmerna-agi n ssuma n uɣrum, drus maḍi ɛecrin dduru i tbagiṭ ara awiɣ, imi ma yewwi-tt yiwen deg tcelwiḍt dɣa xesreɣ akin akka, nessutur ad aɣ-t-id-ren ɣer 12,5 n yiddinaren, i wakken ad ten-senz nekkni s 15 n yiddinaren…”. Ma d yiwen n umezdaɣ n tama-agi yenna-d: “Ur d-ttawiɣ ara aɣrum s axxam, imi nejmaɛen kan gar-asen ssuffɣen-d ccɣel-agi, mebla ma teẓra tneɣlaft n tunzzut, yerna mačči s 5 Da ara yernu ɣef tikkelt, yerna ayɣer i d as-neqsen 50g deg lmizan, imi i d as-rnan 05 Da ɣef ssuma taqdimt, ad greɣ tiɣri s yisem-iw d amezdaɣ n tɣiwant-agi, i wakken ur d-nettaɣ ara aɣrum deg wussan-agi s ssuma-a, alamma iban-d belli d lḥeqq-nsen timerna-agi, acku ala nekni s yiɣermanen (citoyens) i yeččan tiyita, kulec yuli, ala imdanen i yettirxisen deg tmurt-a”.
Adaoun Abdelghani