Ass-nni n larebɛa yezrin, 29 deg waggur n unbir 2017 ɣef 14h00 n tmeddit, tella-d temlilit taseklant tis xemsa sɣur Mass Bendameche Abdelkader deg Temkerḍit tagejdant n tɣuri taɣerfant n lwilaya n Tizi Uzzu. D timlilit yeddan ɣef teɣzi n snat sswayaɛ, immeslay-d umaru akked umnadi deg wayen yerzan idles d tɣerma n ugdud azzayri s umata. D tanemhalt n yidles n lwilaya n Tizi Uzzu Massa Gouméziane Nabila i d-yellan ɣef lmendad n temlilit-agi taseklant, d nettat i d-yefkan awal n tazwara, syin akin tefka-as awal i Massa Sebki s yisem-is d timḍebbert n usizreg n tesɣunt “Livers”, nettat s timmad-is texdem-d agzul i yimuhal d tudert n uselmad d umnadi Bendameche. Sakin, tefka-as aṣawaḍ i bab n usrag. Mi yessuli asarag-agi-ines ucennay d umnadi Mass Abdelkader Bendameche, iger-d tiɣri i yilmeẓyen ladɣa inelmaden yellan dinna, i wakken ad ɣren idlisen n yimura meqqren n tmurt, uqbel ad ɣren ibarraniyen. Yerna ad ṭṭfen deg wansayen d yizamulen-nsen, mačči d ayla n medden ara d-ttawin. Ɣer taggara maḍi n temlilit-agi yekfan lewhi n 15h00, yella-d deg-s wazal n 30 n ddqayeq n tririt ɣef yisteqsiyen n wid yellan dinna. Am wakken daɣen i d-yella ufraq n wugar n 100 n tkerḍiwin timsadrin n yinaẓuren n lwilaya n Tizi Uzzu, d tagnit n lferḥ akked tumert ɣer yinebgawen akk. Ad d-nesmekti belli, Mass Abdelkader Bendameche, ilul ass n 26 tuber 1949 deg Mazagran deg lwilaya n Mostaganem. Yeffeɣ-d seg uɣerbaz aɣelnaw n tedbelt s ugerdas. Syin yexdem deg uɣlif n yidles ddeqs n yiseggasen. syin ɣer-s yuɣal d aɛeggal deg usqamu aɣelnaw adamsan akked yimetti. Yuɣal ixeddem yiwet n tedwilt deg tiliẓri n tmurt. Yedda lweqt yuɣal, d imḍebber amezwaru ɣef usqamu aɣelnaw n lmusiga n cceɛbi. Tura akka, d amaru n waṭas n yidlisen, am wakken d aprufissur n tgemmi tadelsant…atg.
A. A