Mačči d ayen yessefraḥen i yeḍran ddurt iɛeddan deg temnaḍt n Kefrida i ibeɛden s kra n yikilumiṭren ɣef taddart n Ayt Smaɛel. Maca d ayen i yesḥissifen, i yeldin imawen n lɣaci mi slan s yir isalli n teqcict i tečča tmes daxel uxxam-is. Ɣas ma tagrudt-nni, i yesɛan sin n yiseggasen kan di leɛmer-is, ur tenṭir ara aṭas s urɣay-nni seld imi tt-wwin ɣer usbiṭar, teqqim din ad tt-dawin, lameɛna lqerḥ-is yegzem ulawen n yimdanen s uɣiḍi. Ladɣa imi isul d tamecṭuḥt ɛad, ur tessaweḍ i tuqqsa n tmes iweɛren. Ɣef wamek i d-nnan kra n yimezdaɣ n temnaḍt n Kefrida, taqcict-nni taqrurt, d aman yeḥman i as-iḥerqen taglimt-is taleqqaqt. Aya mbeɛd mi tesres setti-s di lqaɛa tabaqit n wuzzal deg-s aman-nni yeḥman, truḥ ad d-tawi isemmaḍen ad asen-tessar. Dɣa, nettat, i d-ikecmen seg tayeḍ n texxamt, am yakk igerdan i iḥemmlen urar s waman, tfares tagnit n tilin-ines weḥd-s tger iman-is daxel n tbaqit-nni war ma teẓra d timḍerrit i tt-id-yettraǧun. Armi d-slan i uɛeyyeḍ-is d yimeṭṭawen-is, uzzlen-d ssufɣen-tt-id sinna, rran yis-s srid ɣer sbiṭar. Ma nebder-d tamentilt i yettaǧǧan arrac imecṭaḥ ad tent-ttawɣen daxel yixxamen, ad d-nini d akken d lqella n tɛessast-nsen i yellan deffir. Imi iban agrud ur yessin leslaḥ-is; ayen i yufa aha ad t-yečč, ad t-isew, neɣ ad t-inal. Yessefk, ihi, ɣef yimawlan ad ttḥezziben i wayen i izemren ad yeḍru. Ad ttɛassan dima igerdan-nsen akken ad ilin deg tɣellist, ur ttḍurrun ara imanen-nsen. Ɣas ad d-mmenden lecɣal-nniḍen, maca d tiɣimit yid-sen i yezwaren send kullec.
Kaissa Khalifi