Ass n 12 deg duǧember-a, ihegga-d Uḥuddu aɣarim n Bgayet yiwet n temlilit deg Uxxam n yidles ɣef wazalen n uḥesses n medden ɣef yimihiyen n tudert s umata, d wid n tegrest abeɛda. Ɣef yimihiyen n tsemhuyt ideg nella, yebder-d Uḥuddu aɣarim amunuksid n karbun i ineqqen acḥal d tirwiḥin, acku stehzayen ɣef yiwellihen n laman. Ugar n waya, aṭas ur neẓri akk amek zemren ad ten-nɣen wallalen i seqdacen I iteddun s lgaz, ama i useḥmu neɣ i wayen-nniḍen. Deg wahil n wass-nni, muggen-d kra n yiḥuna (ateliers) n usḥulfu d uselɣu ɣef yimihiyen imeqqran, imi ula d tiferrawin ttwaferqent i lmend n waya. Am wakken i d-ttwasersent deg temsikkent ddeqs n tɣawsiwin i yesseqdac Uḥuddu aɣarim i usellek.
M. K.