Tuget n yiberden n tɣiwant n Lemɛatqa , taɣiwant i d-yezgan deg unzul n usamer n temdint n Tizi-Uzzu, i ibeɛden fell-as s wazal n 20 n yikilumitren, ha-ten-in deg yir liḥala s sebba n ugeffur i d-yeɣlin s ṭṭaqa deg wagguren iɛeddan.
Rnu ɣef aya, isenfaren yemxalafen yeɛnan, ladɣa, lgaz n temdint, d usenfar n uɛawed n yiqadusen n waman n tissit. Gar yiberdan yenṭarren aṭas, ad d-nebder abrid n tɣiwant i icudden talemmast n tɣiwant ɣer taddart n Izaruden. Taddart-agi yetabaɛen ɣer tɣiwant n Termitin, yexser ubrid, daɣen, i icudden ama ɣer win n ugerzu neɣ ɣer tɣiwant n Boghni akked tɣiwant n Draa Ben Khedda. Imsebriden iteddun deg ubrid-agi, yerkeb-iten lɣiḍ meqqren s sebba n yir liḥala-a. Seg-mi ara tebduḍ abrid ara d-ttafed imerjen deg tlemmast-is akked uɣizi-is deg yal tiɣmart. Liḥala-agi, terza ladɣa abrid n taddart n At Aḥmed, At Zɛim, Lbird Tajediwt, anda ara naf aɣizi n ubrid s waṭas. Asenfar n uɛawed n ubrid-agi aɣiwan, yefeɣ-d yakan deg useggas iɛeddan, maca imezdaɣ n tudrin, ḥabsen-tasenfar-agi alamma yettukemmel usenfar n ubedel n yiqadusen n waman n tissit i iḥebsen acḥal d aseggas-aya. Aɣbel n lexsara n yiberdan, ur yeɛni ara kan abrid-agi i d-nebder, maca yeɛna akk iberden n tɣiwant, ladɣa iberdan imeqqranen, d yiberden yellan deg tlemmast n tudrin. Liḥala yecban tagi, tezmer ad d-teglu s yibaxixen n yiberdan deg talit-agi dɣa n tegrest, tiɣri n yemsebriden i yemḍebbren, teɛna tamsalt i uqɛed n yiberdan-agi n tɣiwant.
Ali Zalouk