Deg wussan-agi kan, i d-yeffeɣ ɣer ssuq udlis wis sin n tmarut d tmazrayt Farida Sahoui, i wummi i tsemma Jugurta, Histoire d’un Peuple. Tulles-d deg-s tudert akked yimuhal n ugellid amaziɣ i d-as-yennan: “Ruma, i lbiɛ i win yebɣan ad tt-yaɣ”, wagi d agellid Jugurta neɣ Yugurten s yisem-is anaṣli, i d-yemmalen (yugar-iten). Temmeslay-d s telqayt ɣef tmeddurt-is, tallit s tallit. Tewwi-d daɣen awal deg-s ɣef umennuɣ-is d ṭṭradat yexdem ɣef tmurt-is. D adlis ara tafem deg temkerḍiyin s wazal n 250 DA, seg tlemmast n waggur-agi n yennayer d afella. Ass-nni n lexmis 18 yennayer 2018, i d-tberreḥ s wudem unsib n ussuffeɣ-ines ɣer ssuq, dɣa texdem yis-s asenzi s ubuddu amenzu, deg rreḥba n udlis i d-yellan taggara n ddurt-agi yezrin deg Tizi Rached. Ad-d nesmekti kan belli, Massa Farida Sahoui, tlul deg useggas n 1972 deg Azazga. D wagi i d adlis wis sin ara d-tessuffeɣ, umbeɛd mi d-tessazreg amenzu deg useggas n 2016, winna iwumi tga isem Familles Kabyles d’Algérié en Tunisie.
A. A.