I lmend n tesmiḍent (100 n yiseggasen) ɣef tlalit akked 50 n yiseggasen n ccna, n ucennay d unaẓur ameqqran Slimane Azem, i lmend daɣen n usmekti wis 35 n tmettant-is, uɣalent-as snat n tejmilin taggara n ddurt-agi yezrin. Tamezwarut, tella-d ass-nni n ssebt 20 deg yennayer 2018, deg temnaḍat Moissac di tmurt n Fransa, d tiddukkla tadelsant “Imeddukkal n Slimane Azem” i d-yellan deffir n leqdic-agi adelsan. Dɣa ɣef 11h00 n uzal, nnejmaɛen waṭas n yiɣriben iqbayliyen d yiḥbiben-is i t-iḥemmlen ɣer tama n yiɛeggalen n tiddukkla-a, deg tmeqbert Moissac anida yettwamḍel. Bedden dinna ddqiqa n tsussmi ɣef rruḥ-is, syin akin sersen ɣef uẓekka-s tameqqunt n yijeǧǧigen. Sakin, ruḥen ɣer umḍiq yewwin isem-is, dɣa xeddmen dinna aṭas n temsikniyin, ldɣa tid n teklut n wudem-is, d temsikniyin-nniḍen. Ɣer tmeddit n wass, yella-d umeslay fell-as s tnagiyin n yimeddukkal-is, cnan-d ula d tizlatin-is, tella-d diɣ tmedyazt, ccnawi tibuɣarin… atg. Am wakken daɣen i d-tella tmeɣra n ccna, ideg ɣennan waṭas n yicennayen, gar-asen Zedek Mouloud, i iruḥen ɣer Paris ɣef ddema n tejmilt-agi. Tajmilt tis snat, tuɣal-as deg taddart-is tanaṣlit Agni Gueghrane, ɣef teɣzi n sin wussan. Ass-nni n lǧemɛa 26 yennayer 2018, ɣef 9h00 n ssbeḥ sersen yimezdaɣ n taddart-is akked yiɛeggalen n tiddukkla tadelsan “Iɣran”deg uxxam-is tameqqunt n yijeǧǧigen. Tin ɣur-s, yella-d umeslay d tnagiyin ɣef tudert-is d yimuhal-is. Ma ɣef 10h00, tella-d temesikent n waddal, syin akin ɣef 11h30, ferqen arrazen i yinaddalen yuzlen s ttawil n tbisikliyin, ma ɣef 14h00 n tmeddit, llant-d snat n temsizzliyin, yiwet n wuraren n usegmi, tayeḍ n wurar n ceṭṭranǧ. Ma d ass-nni n ssebt, 27 yennayer 2018, deg tṣebḥit n wass, llan-d ddeqs n yirmad idelsanen i icudden ɣer tudert d ccna n Dda Slimane. Syin akkin ɣef 12h30, yella-d usarag ɣef umecwar-is d tmeddurt-is sɣur Mass Aknine Arab, Mass Zentar Amar akked Mass Achab Ramdane. Ma seg 16h00 d afella, tella-d turart n yiwet n tmezgunt i icebḥen ayen din, tella-d diɣ tmedyazt akked ccna.
Yettkemmil deg usebtar 13