Yiwen gar yiḥricen igejdanen n unegmu deg ugerzu n Tizi Uzzu, d aḥric n lebni.
Imḍebbren n uḥric-agi n Lebni, qessḍen ad kksen aɣbel n tnezduɣt i iḥuzan akk tamurt n Lezzayer, aya-agi s ujerred n waṭas n yisenfar deg wahilen yemxalafen n lebni. Maca, isenfaren yebdan, yakan, teḍra deg-sen trawnat (anarchie), rnu ɣef waya yir liḥala n tɣara n lxedma d yir liḥala n uselḥu n lecɣal n yisenfaren.
Yir liḥalla n uselḥu n lecɣal n yisenfaren n lebni
Deg yiwet n teswiɛt anda tamurt n Lezzayer teɣli deg uɣbel n lexsas n tedrimt i uselḥu n lecɣal n tmurt, mazal aɣbel n yir aselḥu n lecɣal, ttḥazen iḥricen yemxalafen n uwanak. Sdat n lexsas n tedrimt, srabes n lebni n ugerzu n Tizi-Uzzu (OPG), stehzayen aṭas deg yisenfaren yebddan yakan. Dayen i d-ixelqen leɛḍil meqqren deg yisenfaren n tnezduɣin n tɣiwanin yemxalafen, rnu ɣef aya, aɣbel-agi, yesseker-d lɣiḍ meqqren n yemɛelmen n tkubbaniyin n lebni i d-yelhan s uselḥu n yisenfaren-agi. Aya daɣen yexleq-d asethzi ɣer yimɛalmen, imi aṭas n yisenfaren yettwaḥebsen yakan deg waṭas n tɣiwanin, d yir liḥala ideg i d-grant tnezduɣin.
Tarawnat d yir lxedma deg yisenfaren
Yiwet n teswiɛt ur nessefraḥ ara uɣur yewweḍ lḥal uselḥu n lecɣal n yisenfaren n lebni deg temḍiqt n Leqbayel, ladɣa ayen yeɛnan isenfaren n uwanek. Dɣa deg tirza-nneɣ ɣer waṭas n yisenfaren n lebni, ama deg tɣiwant n Draa Ben Khedda, Draa El Mizan, Boghni, Aghribs, Azeffoun…, dɣa deg kra n yisenfaren n lebni, dayen ur yezmir umdan ad t-id-yales s sseba n yir liḥala ideg llan yisenfar-agi. Deg tazwara, aɣbel, yerza yir taɣara n lxedma, imi kra n lsas n tnezduɣin yettwabnan, iban-d akk, s sebba n waman yewwten s ṭaqqa i d-yeglan s useggex n wakal. Aya, yeḍra deg tɣiwant n Uɣribs deg 100 tnuzduɣin d tɣiwanin-nniḍen n ugerzu n Tizi-Uzzu. Rnu, ɣef waya, yir taɣara n lxedma. Dɣa aṭas n tdukliwin n yimawlan n tnezduɣin i d-ibeggnen lɣiḍ-nsen ɣef yir taɣara n lxedma n yisenfaren s ɣur tikubbaniyin i d-yelhan s lebni n tnezduɣin-nsen. Gar tdukkliwin i d-ihedren ɣef uɣbel-agi n tɣara, ad naf Tiddukkla n yineɣmasen d yimceggɛen n tɣamsa n Tizi-Uzzu, i d-yesfaydin seg usenfar n 100 n tnezduɣin n LPA deg tɣiwant n Draa Ben Khedda. Deg yiwen n umagrad i d-uran yiɛeggalen n tdukkla-agi, beggnen-d yir taɣara n lxedma deg usenfar, ama dayen yeɛnan isufar n lebni smersen d uneḍhur n wuzal ( ségrégation).
Anda llan srabes i d-yelhan s uselḥu n yisenfaren ?
Ɣas ma llan srabes i d-yelhan s temsal n lebni ( les bureax d’étude et le CTC) i ixeddmen i lfayda n uresṣi n yilugan n lebni iwenɛan deg yisenfaren yemxalafen, yetabaɛen ɣer srabes n lebni (OPG), maca , deg unnar, d udem-nniḍen i yellan, d yir taɣara n lxedma. Rnu ɣef waya, astehzi deg usemres n yilugan iseḥḥan, dayen nwala deg tsastant nexdem deg unnar deg yisenfaren yemxalafen, aya dayen i izemren ad d-yeglu s twaɣiyin timeqqranin s sebba n uhuzzu n leqɛa.
Aṭas n yibaxixen n lxedma iseg i d-yegla yir aselḥu n yisenfaren
Ṭṭuqqtent temsal i icudden ɣer yir liḥala ideg llan yisenfaren n lebni, dɣa ula d yir aselḥu n lecɣal n usenfar, igellu-d s yibaxixen yemxalafen, dɣa srabes n yiɣallen n usellek, jerrden aṭas n twaɣiyin deg yisenfaren yemxalafen deg ugerzu n Tizi-Uzzu, ibaxixen-agi, gland s waṭas n lmuta d ymejraḥ, tuget deg-sen d ilmeẓyen.
Ali Zalouk