Ma yella deg tudrin ur d-ttafen ara yimezdaɣ uguren akken ad d-sɛeddin ɣef tezmert-nsen, deg temdinin tigejdanin, am Bgayet d Uqbu, iban-d waya d aɣilif ameqqran, tallit-a taneggarut abeɛda. Ugar n tuɛert akken ad tafeḍ amsujji i yebɣa wul, yettili-d waṭas n lḥers d uraǧu deg tzeɣwa, send ad d-taweḍ i yiwen nnuba. « Ma yella ur teẓwireḍ, ur tezmireḍ ara ad d-tesɛeddiḍ si Bgayet, ad tawḍeḍ di lawan s axxam-ik. Aɣilif mačči d tebɛed n umkan, meɛna d araǧu iḍulen send ad d-taweḍ nnuba ». I d-yenna yiwen n urgaz seg usamar n Bgayet. Ɣef tmuɣli tamatut n medden, ur icudd ara kan waya ɣer lexsas n yimsujjiyen imazzagen akka tura, maca daɣen icudd ula ɣer umḍan n yimuḍan i yettziden, irennu. Imi umuɣ n wid ara yesɛeddin, yal tikkelt yeččaray, yettfiḍ. Ayen yerran ahat araǧu d taɛkemt i yimuḍan deg tzeɣwa n yimsujjiyen, d imi uqan wid i d-yesrusuyen kra i yimsaɣen-nsen deg wacu ara ceɣben, ur ttḥulfayen s taẓayt n wakud yettɛeddin. « Werǧin kecmeɣ i tzeqqa n ṭṭbib, ad afeɣ rsen-d yidlisen i tɣuri. Akken meqqar, yezmer yiwen ad yenɣ akud-is deg wayen yelhan, wala ma yeqqim yettgani s uttqelleq ». D awal n yiwet n teḥdayt. Ahat aɣbel-a n ugani, mazal ur d-terri tuget ddhen ɣur-s. Wamma tili deg yal tazeqqa n umsujji, ad yaf walbaɛḍ kra ad t-yeg deg wakud-nni, d taɣuri neɣ d kra-nniḍen, alamma tuɣal d tannumi deg yal taddart.
M. K.