Yella yiwen n ufellaḥ, ala tamussni i d rras lmal-is, maca nnif d lḥerma d agerruj iγef yesseḥbibir nezzeh. Ihi yiwen n wass, yennuγ d tmeṭṭut-is armi i t-tluqeb, tenna-as: « Lukan sεiγ zzher, nekk seg uxxam n wid yeγṛan, ur ttaγeγ ara afellaḥ leεmer nekcim aγerbaz. Atmaten-iw d At leqlam γef umeẓẓuγ ». Afellaḥ, mi yesla i lehduṛ-agi, yettwajreḥ, acku yeẓra sani i yerran. Dɣa , yenna-yas: « Ihi imi ttwaḥeqqṛeγ akk, ad truḥed tura γer uxxam-nwen, ad ten-testeqsiḍ γef wayen akk ad awen-iniγ. Ma ur d-tewwiḍ ara tiririt iseḥḥan ; ad tuγaleḍ, acku win yeγran mačči d nekkini. Tenna-as: « Bbuh ! Ur yelli usteqsi iwumi ur sεin watmaten-iw tiririt ». Yenna-as: « Ini-asen acu i yerẓagen deg ddunit ? D acu i iẓiḍen di ddunit? ». Tenna-as: « Ah d aya ! tura ara ruḥeγ ». Yuɣ lḥal mmi-tsen la issel i wayen iḍeṛṛun. Yeḥsa yemma-s ur d-tettawi tiririt ilaqen, yessen baba-s d bu lemεun, xwal-is d At-zzux n baṭel. Yuggad γef yemma-s, yeffeγ si ṭṭaq n teεrict, yezwar s abrid, ad iqabel yemma-s. Yemlal yid-s mi tleḥḥu, yenna-as: « Yemma tewwiḍ-d tiririt? ». Tenna-as: « Meεlum ». Yenna-as: « Acu-tt? ». Tenna-as: « I iẓiḍen d tament, i yerẓagen d qeḍṛan ». Dγa, yewwet anyir-is, yenna-as: « Acu i yi-yeğğan zwareγ-am-d s abrid ». Tenna-as: « Ayγer? ». Ynna-as: « Lemmer ad isel i tiririt-a, ad am-yebḍu aqerru. Ma tebγiḍ, ad tkemmleḍ ussan-im yid-ne&gamma,; ini-as terẓeg d ccer, tiẓedt d lxir. Yuγal mi tewweḍ s axxam, yenna-as urgaz-is: « Amek ihi? » ? Tenna-as: « Ad ak-qaṛṛen i yerẓagen d ccer, i iẓiden d lxir. Argaz mi yesla i tririt yuzzel srid ɣer tγurfet, yufa-n mmi-s ulac-it. Yefhem tamsalt, iruḥ-d s azniq yaf mmi-s di beṛṛa, yenna-as: « Imi tselkeḍ wiyaḍ, sellek tura iman-ik. Baba-s: « Acu i iγelben times? ». Mmi-s: « D aman ». Baba-s: « Acu i iγelben aman? ». Mmi-s: « D asawen ». Baba-s: « D acu i iγelben asawen? Mmi-s: « D aɛidiw ». Baba-s: « D acu i iγelben aɛidiw? » Mmi-s: « D argaz ». Baba-s: « D acu i iγelben argaz? » Mmi-s: « D tameṭṭut ».
Yahia Yanes