Thegga-d Tddukkla Algerie Eco-responsable s lemɛawna d tddukkla Axxamn n Dda Ɛli yiwet n twizi n ufras di tɣiwant n Tizi Rached, ass n sebt 17 di furar, si 9 n tsebḥit armi d 16 n tmeddit . Yella-d ufras deg ubrid agejdan n Tɣiwant n Tizi Rached . Si tama-nniḍen, tessawel-d tddukkla Tafrara n Yiɛezzugen i ufras ula d nettat. Leqdic-a, yella-d ass-nni n 16 di furar yerin. Rran-d yimezdaɣ i tiɣri-a imi ssawḍen ad kksen iḍuman, i wakken ad ticbiḥ tiɣremt n Yiɛezzugen . Xas ulamma ttemxalafen yiznan i ssexdament tddukkliwin deg udellel-nsen, yecba “Afus deg ufus, akken ad nekkes ammus, taɛkumt ẓzayen ad tifsus” , “Asizdeg yelha, yif-it limer ur nessamas ara” , meɛna iswi n tddukkliwin yiwen : Tezdeg n twennadt. Imi ur ilaq ara ɣef umdan ad yidir deg umkan anda llan yiḍuman. Aya, igellun-d s waṭṭanen, d ayen i yessexraben di ṣṣifa n twennadt , meɛna tineggura-a, ččuren yiberdan d iḍumman, ladɣa, tiqareɛtin n zǧaǧ. Deg yiwen n ulɣu n useggas n 2016, i d-tessufeɣ OMS, tenna-d d akken : azwu (abeḥri) n tmurt n lezzayer ur zeddig ara, tugar timura anda llant lluzinat s waṭas.
Souhila Yamani