Segmi tewwet tnezlezt tamezwarut ass n 6 furar deg temnaḍt n Unẓul-asamar n Bgayet, ugar n mraw n tnezlaz-nniḍen, ma drus, i d-iḍefren armi d ussan-a. Ihi, ama d imezdaɣ n Uweqqas, n Suq Letnin, n Yiderginen, n Xerraṭa, n Ayt Smaɛel neɣ n Tsexriwt, qrib yal ass, tikwal ula deg yiḍ, ad ḥulfun i tnezlezt neɣ snat ɣef teɣzi n wussan. Ulamma tiseddarin-nsent, ad ilint d timecṭaḥ ɣef Sellum n Ricter, maca argagi-a n tmurt i yugin ad yeḥbes deg tama-a, yegla-d s kra, neɣ ahat s ddeqs, n ukukru d tugdi deg wulawen n yimezdaɣ. Abeɛda imi deg tannumi, tzellez tmurt deg leǧwahi-a ala gar tallit iruḥen seg magguu armi d unbir, ma deg tegrest, aya walan-t medden d amaynut, acku werǧin tezlez annect-a deg drus n wakud. « Sebbat n zzenzlat-a deg temnaḍt-nneɣ ayen d mi ur terɛiḍ ara ɣur-neɣ maḍi, acḥal tura d ayyuren. Ahat xussen waman deg yigenni. Ula d ageffur d udfel yewwi-d tili wwin-d rrɛuḍ, maca ur nesli i kra ». I d-tenna yiwet n temɣart. Ɣef tmuɣli n yimussnawen n taɣult, azlaz-a amectuḥ seg tikkelt ɣer tayeḍ, mačči d amihan. Llan wid i d-yeqqaren yelha, meskud tamurt tesnuffus kra kra, tessufuɣ-d tiḥersi i yellan deg-s. Ad d-nesmekti d akken tanezlezt tamezwarut n furar iɛeddan, i yewwḍen ɣer 4,2 n tseddarin, aṭas i tesseḥbes n lecɣas i kra n wakud, aṭas i d-tessufeɣ n medden ɣer berra n yixxamen-nsen daɣen. Tura akka, ssaramen lɣaci mi d-tekcem tefsut, ad terked dayen tmurt, ad uɣalen waman i tregwa-nsen.
M. K.