Yenna-d ussan-a iɛeddan unemhal amatu n uxxam aɣelnaw n yizerfan n umeskar (ONDA), deg yiwen n usarag i iga, d akken yella wayen ara d-yennulfun d amaynut deg taluft n uxelles n yizerfan n umeskar, abeɛda acennay. Mass Sami Bencix yenna-d: « Ilaq ɣef wat iṭaksiyen, tizeɣwa n useṭṭel, iseččuyen d kra n yimeḍqan-nni n ttjara ideg i d-xeddmen aẓawan, ad ttxellisen izerfan n umeskar i ONDA. Aya yettmagga deg yakk timura yuẓen ».
D ayen i d-yesselɣa Mass Bencix i taɣamsa. Sya d tasawent, ur trezzu ara ihi taluft at yiṭaksiyen kan, maca ula d kra n yixxamen n ttjara ideg i d-xeddmen aẓawan, am deg tḥuna n wučči, n useṭṭel, atg. Deg wayen i d-yerna deg wawal-is, aya mačči d ayen ara yilin ɣlay ɣef wid yettxellisen, imi iswi d ajmaɛ n uzref n unaẓur akken ur yettenḍeggar ara. Amedya n bab n uṭaksi, ad ixelles azal n 2000 n yidinaren. « I win yesɛan aṭaksi, yezmer kan ad ixelles armi d 2000 n yidinaren i useggas. Aya mačči d ssuma tageɛmirt i netta, maca i ONDA d yinaẓuren, ta d taɣbalut n lɛali. Llan dɣa kra n yisensuyen i yettxellisen armi d 4 n yimelyan santim i useggas », I d-yessegra Mass Bencix.
M. K.