Aṭas i as-yeqqaren tuɛer tmaziɣt almi llant twaculin ttagadent ad tt-ɣren warrac-nsent, ahat d nettat ara yilin d sseba n lexsara. imi tuɣal taɣuri i yikayaden mačči i tmusni.
Segmi skecmen, ilindi, tamaziɣt ɣer yikayaden n BEM d win n BAC, aṭas n yinelmaden i d-yeqqaren yes-s i nerbeḥ. Tilawt d tizrawin i tt-id-yemmalen. Dɣa, newwet ɣer tewwurt ilaqen akken ad aɣ-d-fken igemmaḍ n tmaziɣt deg ukayad BEM.
Ad naf deg waṭas n yiɣerbazen anda iselmaden seqdacen ayen iwmi neqqar s tmaziɣt aselmed s yisenfaren la pédagogie de projet, sawḍen ad sɛun nnig 80 % n warrac iɛeddan 10 deg ukayad. Ad d-nefk amedya n yiɣerbazen : Ben-messaoud Rabia At Mlikec 84,53% ; Internat Akbou 90,02% ; Frères Guenini Seddouk 80,01% ; Irid Md Amezyan Akfadou 94% ; Aokas 89% ; Adekkar 90,2%. Deg Tizi Wezzu, yewweḍ ɣer 100% seg yinelmaden yesɛan nnig 10.
Aya yeskan-d azal n tmaziɣt deg uɣerbaz azzayri. Meɛna mačči d tamaziɣt-nni kan i yellan d ssebba. Kra yella kra yerna. Yella daɣen amek i tt-yesɣar uselmad. Iselmaden yesseqdacen aselmed s yisenfar, ur ssiɣzifen awal ɣef tjerrumt d tseftit, ur smarayen ara ijerriḍen n tuqqna ɣef yinelmaden, sduqussen-d arrac ad walin s yiman-nsen ayen i yuḥwajen, d nutni i yettnadin.