Mbaεd 30 n yiseggasen n lγiba n unaẓur Yidir, imdane it-ḥemlen akked imezdaγ n temnaḍt-is At-Yanni d taddert-is At-Laḥsen ggren-d nnahta, imi id-yuγal yetri γer irebbi n tmurt-is, γer wakkal n lejdud-is i t-id-isekren. Γas akken yebεed acḥal n yiseggasen maca yeṭṭef dima deg isseγ-is, deg yedles-is amazi&gamma,; imi amennuγ-is mači n wass-a. Tuγalin-is γer tmurt n Lezzayer tella-d d tunḍct yelhan i waṭas n leqbayel, imi tettunnefk-asen tegnit akken ad-mlilen yid-s ilmend n tfaska n tgemmi adelsan n leqbayel id-yellan deg ussan n 05 almi d 09 unbir 2015. Deqs n yemyura d yinaẓuren i yellan di ttiεad-agi adelsan, ger-asen Tasaεdit Yassin, Kamel Ḥamadi, Kamel Tarwiḥt, Mohamed Saadi d wiyaḍ niḍen. Ass larebεa yezrin 11 deg aggur n unbir ideg nella, yidir igger irebbi i temlilit akked ineγmasen deg usensu n Snat n Tezdayin «Les Deux Palmiers» di temnaḍt n Draε Ben Xedda, lwilaya n Tizi-Wezzu. Deqs n yineγmasen id-yerran i teγri akken ad-ḥṣun s yisenfaren n ucennay Yidir, tamentilt n lγiba-s deg annar n cna di tmurt n Lezzayer deg seggas n 1979, d acu i yebγa at-yexdem sya d afella. Syen yerra-d s wul zeddigen γef deqs n Yisteqsiyen n yineγmasen, am ayen icuden γer tsartit d tdamsa n tmurt, timmanit n leqbayel. Deg useggas n 1977, tizlit n Yidir « A Baba Inuba » tufrar-d ger yetran, yal tamurt di ddunit slan-as syen suqlen-tt γer tutlayin niḍen ma drus 30. Aselway n tmurt n Lezzayer di tallit-nni, Hewari Bumedyan, yebγa ad-iẓẓar Yidir, yussad γer tmaγra i-yexdem deg tzeqa n coupole di Lezzayer tamanaγt, netta akked yemḍebren meqren n tallit-nni. Yidir muḥal yecna deg seggas n 1979 di tmurt n Lezzayer ar ass-a, sebba imi ulac win is-yesawlen, wama yebγa ad-yecnu s wul zeddigen deg irebbi n tmurt-is, maca yezga yettara-d i tinubga n tmura n tmazγa am Lmaruk dTunes, akked tmura n lbarani, am Fransa, Kanada d tiyaḍ niḍen. Γer tagara yidir imeslay-d γef lalbum-ines ara d-yefγen sya d afella, imi tura yebda yettheggi akked icennayen meqren n tmurt n Fransa am Charles Aznavour,Maxime le Forestier, Patrick Bruel, Bernard Lavilliers akked tcennayt n tmurt n Irland Sinead-Marie O’Connor. Dγa lalbum-agi ad-yeffaγ di tefsut n yimaziγen n useggas id-iteddun (20 yebrir 2016).
Acennay yidir, tuγal-as tejmilt ddurt yezrin di temnaḍt-is At-yanni s tikci n ciεa » Itri n Lfeṭṭa ». Akken id-yerza γer taddert n Yigarsafen, taγiwant n At-Yeğğar di temnaḍt n Wizgan, yerra tajmilt i yimezdaγ n taddert-agi zeddigen, imi tudert yelhan tettek-d di tezdeg.
Islam Bessaci