Deg wass n larebɛa iɛddan, 21deg meɣres i deg-i nell, i telli tiwwura-s s wudem unṣib teẓrigt tis tmanya ( 8) n Tmeɣra n tzemmurt i d-suddes tddukkla tadelsant Tigejdit n At Zɛim d tesqamut n taddart, s ddaw leɛnaya n Usqamu aɣerfan n ugerzu n Tizi Uzzu, Tanmehla n yidles d Usqamu aɣerfan n tɣiwant n Lemɛatqa…
Tell-i tiwwura-s s wudem unṣib sɣur uselway n Usqamu aɣerfan n Tizi Uzzu, Mass Aouchiche Youcef, imeḍebber amezwaru n dayra n Lemɛatqa, Mass Keddaoua akked uselway n Usqamu aɣerfan n tɣiwant n Lemɛatqa Mass Laguel Lyes. Am wakken ḥḍeren daɣen aṭas n yimḍebbren yetabaɛen ɣer tnemahliwin yemgaraden ama d Tanmehla n yidles, Tanmehla n tmarrit d tinḍi, Tanmehla n yilmezẓen d waddal, Tanmehla n srabes n tfellaḥt d waṭas-nniḍen. Tell-i tmeɣra s tarbaɛt n Idballen d terbaɛt n ccḍeḥ aqbur i d-yussan seg At Mendas. Ugar n 70 n yimdanen i yekkan deg tmeɣra-agi. Ussan-d seg rebɛa n tɣemmar n tmurt. Asentel n tezrigt-agi, yerza taɣara n zzit n uzemmur gar ‘’Tmuɣli tussnant d tmuɣli tadelsant n tmetti Taqbaylit’’. Iswi n Tedwilt-agi, d aseqreb n tmuɣliwin i icudden ɣer tɣara n zzit n uzemmur, awenaɛ deg tɣara, asnegmu n lɣella, axlaq n tddukkliwin i icudden ɣer lɣella n uzemmur, aseḥbiber ɣef tgemmi d tmagit tamaziɣt. Deg tazwara, tella-d yiwet n dqqiqa n tsussmi ɣef lerwaḥ n yimeɣrasen yemmuten ɣef tugdut d telleli, syin d awal n uselway n tddukkla tadelsant Tigejdit i icekkren aṭas wid i iḥedren deg tmeɣa d wid d-yefkan afus n tallelt i wakken ad tt-suddsen. Am wakken i d-yewwi awal ɣef wazal tesɛa tzemmurt deg temḍiqt n leqbayen d wayen i icudden ɣer tgemmi d tmagit tamaziɣt, ɣef wazal, diɣ, tesɛa lɣella n uzemmur deg tdamsa n tɣiwant n Lemɛatqa. Syin, yettunefk wawal i uselway n tesqamut n taddart akked yimḍebbren i iḥedren din. Tebda tmeɣra s tirza n temseyniyen d usalay n tddukkla akked tisyar tiqburin. Tella-d, diɣ, lweɛda i d-yettuheggan i lmend n waya. Ɣef tmeddit n wass amezwaru, yella-d yiwen usarag s wazal-is ɣef usentel n lɣella n uzemmur d tmuɣli n uzekka, anda ḥedren aṭas n yimḍebbren teɛna temsalt, yecban anemhal n srabes n tfellaḥt n Tizi Uzzu, Mass Kouraba Karim , imeḍebber n tfellaḥt n Lemɛatqa, Massa Henni Nadia seg l ITMAS n buxalfa, Massa Tanemhalt n SRPV n Draa Ben Khedda d Massa Hasnaoui Naima, timḍebbert deg SRPV, rnu ɣef waya, ḥedren aṭas n yifellaḥen d imɛalmen n tesyar. Deg wass wis sin, llant-d temsekniyin seg 9 h n sbeḥ ar 17 h n tmeddit, llan-d aṭas n yisekwan i icudden ɣernusewwi aqbur n leqbayel, asewwi n savon s tarayin tiqburin, tiztin, afras d ulqam n uzemmur. Ɣef lewhi n 13 h n tmeddit n wass, llan-d yisaragen sɣur Mass Doufene Hocine, d aselmad d amnadi deg tesdawit n Mouloud Mammeri n Tizi Uzzu i d-yewwin awal ɣef wazal i sɛant tddukkliwin yemgaraden deg unegmu n leɣella n uzemmur. Mass Arkoub Mouloud, d aselmad u d amnadi deg tesdawit n Mouloud Mammeri n Tizi-Uzzu, ula d netta yewwid awal ɣef wamek nezmer ad nesnerni u ad neḥrez isufar i icudden ɣer lɣella n uzemmur ama d amegruc neɣ d amurej. Ma d iɛeggalen n tddukkla ( Association de l’Initiative pour le Développement Durable, AIDD) n Tesdawit n Tizi-Uzzu, nutni hedren-d ɣef waṭas n yisental yerzan lɣella n uzemmur, aladɣa taɣara n zzit n uzemmur, isufar n uzemmur, lfayda n zzit n uzemmur. Deg taggara, yuɣal-d Mass Meziani Hocine, imḍebber n tfellaḥt n Lemɛatqa, ɣef waṭas n temsal i icudden ɣer uḥric n uzemmur. I lewḥi n rebɛa n wussan i tedda tmeɣra n tzemmur, ahil d amerkanti, aṭas n leqdicat ussnanen d leqdicat idelsanen i d-yellan deg unnar.
Ali Zalouk