Tettkemmil deg Uweqqas tdukkla Azday Adelsan aheggi n yisaragen-is, iseklanen yal taggara n ddurt. D ttiɛad i ttraǧun tura mačči ala imezdaɣ n Uweqqas, wanag ula d imḥemmalen n tsekla deg Tmurt n Yizwawen merra. Ladɣa imi simmal neccden imura s tutlayt n Mulud At Mɛemmer. Ass n 11 deg unbir iɛeddan dɣa, d amaru Aweɛmer Uleɛmara i d-yettwanecden i Tɣellust taseklant akken ad d-yawi awal ɣef yidlisen i d-yessufeɣ. Ulamma ur telli tgerrez liḥala n tegnewt, meɛna ddeqs n yiterrasen i d-yerzan ad ttḥessen i win i yesɛan amezruy yelhan deg umaḍal n tira. Ula d askasi i d-iḍefren asarag, yella igerrez, ɣef tnaga n umsarag s timmad-is. « Yeɛjeb-iyi aṭas usnubget d uswir aɛlayan n uskasi deg Uweqqas. Ssarameɣ asken-iw yerra-d i wayen tettraǧu terbaɛt n « Tɣellust taseklant » d uzayez. Ad d-uɣaleɣ s tedfi ɣur-wen ɣer sdat, i lmend n tsufaɣ (publications) timaynutin ». D tanaga-a i d-yura Mass Uleɛmara i wat Azday Adelsan. I usmekti, Aweɛmer Uleɛmara d amaru, d amazzag amecciwer deg usefrek. Ilul deg taddart n Budafal, tazwara n yiseggasen n xemsin. Deg temẓi-is yeɣra tasengama, tussna d tjerrumt tamaziɣt. Deg 1985, yella gar yiɛeggalen i d-yesbedden tamɣunt (ligue) tazayrit n uḥuddu ɣef yizerfan n umdan. Yessufeɣ-d ar tura 7 n yidlisen, ad d-nebder seg-sen »Akkin i udrar » d ungal. « Iberdan n tissas » d adlis ɣef tmeddurt n umǧahed Mesɛud At Ɛemmar. « Tullianum » – Taggara n Yugurten », d ungal. « Timlilit di 1962 », d ungal daɣen.
M. K.