Thegga-d tiddukkla “Eco Action” i igedcen deg tesdawit n Mulud Mɛemmeri n Tizi Uzzu, yesseḥbibiren ɣef ugamma daxel n tesdawit-agi, yiwen wass n useɛlem n yisdawanen ɣef wamek yezmer ad ad iḥder ɣef twennaḍt. Yella-d leqdic-agi amerkanti, daxel n tesdawit n Ḥesnawa 1, sdat n temkerḍit tasdawant, ideg xedmen ddeqs n temsikniyin yesɛan assaɣ akked uḥbiber ɣef twennaḍt. Llant temsikniyin ɣef kra n yisufar n tuččit yeṭṭur amdan am Tireɣlin, Abquq…atg. Llant daɣen tid i d-imeslayen ɣef yiḍuman, d wamek ara asen-yexdem umdan i wakken ur yeṭṭuru ara akal neɣ igenni. Llant daɣen tid i d-yewwin awal ɣef wammus s leṣnaf-is yemxalafen. Yerna yal timsikent tesɛa ilemẓi neɣ tilemẓit ara d-yesfehmen i win yerran lwelha-s ɣer kra n temsikent. Leqdic-agi yedda ɣef teɣzi n sin wussan, imi yebda ass-nni n lḥed 17 meɣres 2018 tkemmel azekka-nni n letnayen 18 meɣres 2018. D tagnit anida ẓẓan yiɛeggalen n tiddukka-a akked yisdawanen, ugar n 500 n yisekla (ṭṭjur) s leṣnaf yemxalafen deg yimeḍqan yemgaraden n tesdawit-agi n Ḥesnawa 1. Ad nesmekti kan belli tiddukkla-agi, tlul-d deg useggas n 1999 sɣur agraw n yiselmaden d yinelmaden, yeqqaren neɣ yessɣaren deg yigezda yemxalafen n tesdawit Mulud Mɛemmeri n Tizi Uzzu. Seg yimir ar ass-a nettat d leqdic deg unnar-agi n useḥbiber ɣef ugamma daxel n tesdawiyin yellan deg temdint n Tizi Uzzu. Mass Takfarinas Belɛidi, s yisem-is d amaray amatu n tiddukkla-agi “Eco Action”, ha-t-an wayen i d-yenna: “ I lmend n wass amaḍlan n useklu, i d-yettilin yal 21 meɣres, tiddukka-agi-nneɣ thegga-d sin wussan n useɛlem ɣef ugamma d twennaḍt daxel n tesdawit. Neɛreḍ s temsikiniyin yemxalafen, ama ɣef wammus, ama ɣef yibaɛɛec neɣ yimɣan n useǧǧi, i wakken ad nsefhem isdawanen d acu d ammus n ugamma, amek i d-yettili d wamek nezmer ad t-nekkes”.
G. A.