Akken yella lḥal n tsemha, n yilel agrakal; ussan n tegrest wezzilit, uḍan ɣezzifit. Igenni d aberkan s usegna, idurar d imellalen s udfel, iɣezran d yisafen, ččuren d aman, taliwin d laεnaser ttazalen; aya d lxir n tegrest. Maca llan kra n yimukan anda teḍra twaɣit ama s waman n yiḥamulen; wid i xulfen adeg n tikli-nsen , neɣ s waman uffiren; wid yellan ddaw n wakal. Gar temnaḍin, yenṭṭerren s waman uffiren « Aneqquc, Rrif » akked tɣiwant n At Smaεel d temnaḍin-is merra. Tadyant-a tella-d s tmental n waman wid yettazalen ddaw n tmurt, d tadyan i d-yeǧǧan lǧerrat d ccwami, mačči kkan deg wallaɣ n yimezdaɣ n temnaḍin-a, yekcem uḥeyyir, d uxemmem amek ara tefru taluft ? imi ur d-iban ara yixef-is; ɣas akken, yella-d unekcum n yiεeggalen n useqqamu aɣerfan n snat n tɣiwanin-a « At Smaεel akked Taskeryut », anekcum-a yella-d s wallalen n uqaεed n yiberdan, iwakken ad xiṭen acerreg n ubrid, maca « yeɣleb bu cerrig tafawet ». Ulac dacu ara xedmen? Ul yezmir yiwen ad yessergel tazmert n ugama; imi tazmert-is tif tazmert n umdan. Tadyant-a, tebda-d deg useggas yezrim, maca yella-d kra n ustehzi sɣur yiεeggalen n tenmehla n lecɣal n lbaylek « D.T.P » n Xerraṭa, ɣas akken εerḍen ad qaεden kra deg-s, uɣalen qqimen lecɣal d azgen, neɣ d ayen i sekfan deg usenfar-a. Abrid-a d win yeqqnen gar Bgayet d Sṭif seg tlisa n tɣiwant n At Smaεel. Uṭṭun-s 06 ( C.W 06). Ass n 26 di furar 2015, ɣef tis 10 n tsebḥit; imi bdan yimdanen, la ttwalin abrid, yellan gar « Aneqquc » akked « Burǧ Mira » la iḥedder, ḥsan d akken d tawaɣit i d-yewḍen; imi tawaɣit-a ad tuɣal d asergel n ubrid. Seg teswiεt ɣer tayeḍ, abrid, yellan yelha yebda yettuɣal d amdun, iḥedder kkan d agsar; alammi yuɣal d tiseddarin, ur yezmir ula d yiwen ad yezger s ttumibil ( takerrust ), yuɣal ubrid ibellaε. Γas akken yella-d unekcum s temɣawla n yiεeggalen n useqqamu aɣerfan n tɣiwant n Taskeryut, akked tin n At Smaεel d yiεeggalen n D. T. P n Xerraṭa akked yimezdaɣ n snat n temnaḍin-a yenṭṭerren, maca ayen ad as-rnan neɣ ad as-ssan d akal i umdun-a yugi ad iqeεεed; amkan-a mazal iḥedder kkan. Taluft ur teḥbis ara kkan da, maca abrid yettwaɣ merra, yal amkan yebda iḥedder, llan ula d kra n yimukan yegla s usyax n wakal d yisekla akked larsam n laryuf n ubrid. Abrid-a yebḍa ɣef yiḥricen. Yuɣal ubrid d tiseddarin d timducin war aman. Imezdaɣ n temnaḍin-a « Aneqquc, Rrif » akked tɣiwant n At Smaεel nṭṭerren s twaɣit-a, imi ẓẓran d akken d taεkumt ẓẓayen ɣef tuyat, imi tifrart-is ur tban ara, ar tura.
Nacer Akouche