Zrin 59 n yiseggasen ɣef tmenɣiwt n Amirouche akked Si Haoues deg udrar Thameur tama n Bousâada. Bdan tikli ɣer Tunes ass n 6 deg meɣres 1959 i wakken ad mlilen CNRA, ddan yid-sen azal n 40 n yimjuhad.
Ffɣen tamurt n leqbayel s unẓul, gar Djelfa akked Bousâada. Acu kan, ɣef wakken i d-nnan, yeffeɣ lexbar n ubrid ara wwin ; yewweḍ ɣer yiserdasen d yimḍebbren n Fransa. Kra qqaren fehmen yiserdasen n Fransa asalli seg ttawilat n usiweḍ, wiyaḍ nnan-d yewweḍ-iten lexbar srid. Ihi, imi yesla lkulunel Ducasse s yisalli-agi, yundi-asen taxezzabit gar udra n Thameur akked udrar Djininibia i ibeɛden s wazal n 75 n yikilumitren ɣef temdint n Bousâada. Yeḍra ubaxix din imi mmuten Amirouche, Si Haoues akked 35 n yimjuhad u ttwaṭṭfen 5 deg-s. Mebɛed timenɣiwt n Amirouche akked Si Haoues, yewweḍ isalli seg Lezzayer tamaneɣt ɣer din i wakken ad ten-meḍlen s tuffra deg lkazirna n Ain El Melh. Teqqim tedyant d tuffirt armi d ass n 7 deg duǧember 1962, mi yebɣa yiwen Urumi Jean-Louis Gallet ad d-yeḍleq i sser ɣef temḍelt n sin-agi n yimjuhad. Acu kan yecreḍ idrimen. D Zouaïma i ixebbren Boumediene akked Abdelkader Chabou s tedyant-agi. Syin, ceyyɛen yineggura-gi, Cherif Mahdi d Abdelmadjid i wakken ad walin Arumi-nni. D nutni, diɣ, i yettwakelfen i wakken ad d-skeflen iẓekwan n Amirouche akked Si Haoues seg Bousaâda. Seg yimir, qqiment tfikkiwin-nsent d tuffirin deg lkazirna n yiǧadarmiyen deg Lezzayer tamaneɣt armi d ass n 24 deg tuber 1984 i asen-d-yuɣal ccan u ttwameḍlen deg tmeqber n Lɛelya. D aselway Chadli i d-yeskeflen tadyant mebɛed mi inuda mmi-s n Amirouche ɣef yiɣsan n Baba-s. Ɣef uqerru n taluft-a, ad naf tlata n yimḍebbren : Houari Boumdiene, Abdelkader Chabou akked Ahmed Bencherif.
Hocine Moula