Ass-nni n lexmis yezrin, 29 deg waggur n meɣres 2018 ɣef 10h00 n ssbeḥ, tella-d temlilit taseklant tis sebɛa sɣur Mass Kacimi Samir deg Temkerḍit tagejdant n tɣuri taɣerfant n lwilaya n Tizi Uzzu. D timlilit yeddan ɣef teɣzi n snat sswayaɛ anda yemmeslay-d umaru akked uneggal yettarun s tutlayt n taɛrabt ɣef waṭas n temsal. D tanemhalt n yidles n lwilaya n Tizi Uzzu Massa Gouméziane Nabila i d-yellan ɣef lmendad n temlilit-agi taseklant, d nettat i d-yefkan awal n tazwara, sakin tefka-as aṣawaḍ i bab n usarag i d-imslayen s telqayt ɣef wungal azzayri, am wakken daɣen i d-yewwi awal ɣef umecwar-is ɣezzifen deg tira n wungalen. Mi yessuli asarag-agi-ines umaru d uneggal Samir Kacimi, iger-d tiɣri i yilmeẓyen ldɣa inelmaden yellan dinna, i wakken ad ɣren idlisen n yimura-nneɣ meqqren n tmurt, uqbel ad ɣren iberraniyen. Ma ɣer taggara maḍi n temlilit-agi yekfan lewhi n 12h00, yella-d deg-s wazal n 45 n ddqayeq n tririt ɣef yisteqsiyen n wid yellan dinna. Ad d-nesmekti belli, Mass Samir Kacimi d amaru n waṭas n wungalen s tutlayt n taɛrabt yecban; Ass ameggaz n lmut 2009, Aberreḥ s rrwaḥ 2010, Win yettargun 2012, tayri di lexrif immalen 2014…atg. Am wakken i ttusuqlen waṭas n wungal-is ɣer tutlayin tiberraniyin. Dɣa ungal “Tayri di lexrif immalen” yettusuqel ɣer tefransist s uzwel-agi “L’amour au tournant”, ma d ungal-nni “Win yettargun” yettusuqel ɣer teglizit d telmanit.
Ghani Amazigh