Tella-d ass-nni n lexmis 29 meɣres 2018, deg Temkerḍit tagejdant n tɣuri taɣerfant n Tizi Uzzu, tmeɣra n ufraq n warrazen i 15 n yinelmaden n uɣerbaz alemmas Alliche Youcef n Beni Douala, i d-yufraren deg temsizzelt n tira ɣef tudert d yimuhal n umaru amaḍlan Mouloud Feraoun. D leqdic i d-thegga tiddukkla tadelsant Mouloud Feraoun, i d as-yettaran yal aseggas tajmilt meqqren deg taddart-is Tizi Hibel. Myezwaren yinelmaden n uɣerbaz-agi ɣef 15 n yimeḍqan imenza, dɣa seg yal tutlayt, fernen-d xemsa-nni n yimezwura. 5 n yinelmaden ufranen-d s tutlayt n tmaziɣt, xemmsa-nniḍen, ufranen-d s tutlayt n tefransist, ma d xemma wiyaḍ s taɛrabt i d-ufraren. D Massa Goumziane Nabila i d-yefkan awal n tazwara ideg tessenmmer aṭas tiddukkla-agi tadelsant i d-iheggan leqdic-agi akked yinelmaden yettekkin deg temsizwert-agi. Am wakken daɣen i yerra Mass Nessah Mokrane, s yisem-is d aselway n tiddukkla-agi, tajmilt meqqren i tnemhalt n yidles i lmend n wayen i d-tettak i yidles n lwilaya n Tizi Uzzu. Ma d aɣella n ladayra n Beni Douala, yuɣal-d ɣer leqdic n tiddukkla-agi i iqedcen aṭas deg unnar. Tella-d diɣ tmenna n kra n yisefra sɣur yiwet n temɣart n Tizi Hibel, am wakken daɣen i d-ɣran tlata n yinelmaden iḍrisen-nsen yufraren. Ha-ten-in yinelmaden i d-yufraren: Hamel Tayeb, Ziram Damia, Ouchek Massilia, Allouche El Hadi, Halit M’henna, Djadel Anais, Grin Thiziri…atg. “ Nhegga-d leqdic-agi, ass-nni n 15 meɣres 2018 deg uɣerbaz alemmas Allouche Youcef n Beni Douala. Ad asen-iniɣ akk i wid i d-yufraren kulci mebrek, nessaram-asen afud igerrzen ɣer sdat, ilaq ad nili ɣer tama-nsen imi d nutni i d irgazen n uzekka, d nutni i d asirem n tmurt n Lezzayer…”, i d-yenna Mass Nessah
Adaoun Abdelghani