Tebɛed taddart Iɣil Mḥend ɣef tɣiwant n Ait chafaa s wazal n 12Km. Tamuɣli si taddart-a srid ɣer yilel , tezgad di temdint n Uzeffun, tesɛa amekkan-is deg umezruy n tmurt. Akken i d-ḥekkun yimezdaɣ-is, aṭas n yiserdassen n Cix Aḥeddad i yettwameḍlen di taddart-a, di lwaqt-nni n tegrawla. Acu kan, seg yimir-n ar ass-a, liḥala n tmeqbart ur tgerrez ara. Ɣef waya, ssuturen yimezdaɣ n taddart di tenmehla n yimjuhad akken ad smuzget i teɣri i d-xedmen, ad d-tefk afus n lemɛawna akken ad yettwajarred umekkan-agi d amdiq n umezruy n tmurt. Am wakken daɣen, ad ttɛawen taddart-a deg useqɛed n umekkan-agi, akken i d-ibarreḥ yiwen seg yimezdaɣ : “ Nekni s yimezdaɣ n taddart n Iɣil Mḥend, nebda aseqɛed deg umekkan-a, meɛna mačči d ayen i nezmar ad nexdem weḥd-neɣ. Ihi nessutur deg tenmehla n yimjuhad n ugezdu n Tizi Uzzu akken ad d-smeḥses i wayen nessutur, yerna-d : ‘’Ha-t-an, ad nexdem asebdad deg umekkan-agi i wakken amezruy n taddart ur yettali ara fell-as uɣebbar n tatut, akken tasuta i d-iteddun, ad twali amezruy n temnaḍt “ . Akken i d-nnan imɣaren n taddart, ad ilin azal n 490 n yiserdasen i yettwameḍlen deg tmeqbart-a . Ad d-nesmekti belli taɣiwant n Ait chafaa, tefka-d aṭas n yiwudam, ger-asen : Tahar Djaout , Bachir Hadj Ali , Mohamed Aouine .
Yamani Souhila