Tɛum Bgayet deg waman

Partager

Ageffur aneggaru d udfel i d-yeɣlin s ṭṭaqa deg waɣir n Bgayet, glan-d s waṭas n txessar d wuguren i yimezdaɣ. Ɣef wakken i d-yewwi Uḥuddu aɣarim (Protection civile) n Bgayet, deg wulɣu i aɣ-d-yewwḍen, ugar n semmus n yiberdan i imedlen deg sin n wussan-nni ideg yettwaɣ lḥal maḍi. Amedya n udrar n Yicellaḍen, ideg teḥbes tikli deg ubrid aɣelnaw wis 26A. Snat n tnilliwin n Leqser ttwamedlent daɣen ɣef ssebba n ufiḍi n Wasif Asemmam (Sumam), armi d abrid aɣelnaw wis 75 i d-imugren d asellak wid iḥeslen. Ijerred daɣen Uḥuddu aɣarim aṭas n tuffɣiwin i ferru n yiɣilifen d usellek n medden. Gar-asent, ad d-nebder, tuffɣa ɣer Melbu, ɣer Termist ICOTAL n Bgayet d Saket, mbeɛd aggelgel n waman. Yettwajerred daɣen usellek n temrawt n tfunasin i iḥeslen deg wasif, tamnaḍt n Rmila, akked tukksa n yiwet n ṭṭejra d tameqqrant, i d-yeɣlin ɣef uɣlad deg Leqser. Ad d-nesmekti d akken llant-d ula d kra n usyax n wakal, abeɛda deg Leflay, Tiban, d Bulimat.

M. K.

Partager