Ilmend usmekti n umuli wis 51γef timunent n tmurt n Lzzayer, id-yettuγalen yal ass n 5 yulyu di yal seggas, i yellan daγen d ameγra n yelmeẓyen, deqs n leqdicat id-ittewhegan γef dema di yal tamnaḍt n tmurt.
Dγa taddert n yigersafen, taγiwant n At-Yeğğar yetabaεen dayra n Wizgan, tesfaydi-d s wecεal n lgaz n temdint i lfayda n nnig n 400 n yexxamen.
Γef dema n waya tella-d yiwet n tmeγra meqren id-sudes tdukla tadelsan ALMA n taddert n yigarsafen s lemεawna n tesqamut n taddart-agi akk d yimezdaγ-is. Ahil i ittewjarden d amarkanti, anda llan temzikniyin yemgaraden γef umezruy azzayri d tegrewla n 54 akk d isaragan, cnawi d waṭas niḍen.
Tameγra-agi tella-d s leḥdur n yemḍebren yemgaraden, ger-asen aselway n Dayra n Wizgan, aselway n tγiwant At-Yeğğar, tawacult n yigrewliwen, imḍebren n tkebbanit n Sonelgaz d tkebbanit yeṭfen lxedma usenfar-agi d deqs n yinebgawen n lḥerma i d-yussan si yal tamnaḍt. Asenfar-agi yekcem deg ahil unegmu aγelnaw n yiseggasen 2010/ 2014. S leḥsab-agi, yewweḍ lxedma usiweḍ n lgaz n temdint di tγiwant n At-Yeğğar 70%. Dayen i yeskecmen lferḥ meqren γer wulawen n yimezdaγ n taddert n Yigarsafen, imi d asenfar ara yeksen taεkkemt fell-asen.
I. B.