Deg waɣir n Bgayet s umata, iban-d amek uqan ayendin yimeḍqan d tzeɣwa anda yezmer yilemẓi ad yelmed aẓawan neɣ ad yissin tigejda n tẓuri-a. Mačči d ayen isehlen akk ɣef yiwen ad yaf axxam-a n ulmad n tetiknikin d tarrayin n uẓawan. Ma yella deg yiseggasen yezrin, ur grin tamawt lɣaci n temnaḍt-a i lexsas-a, tura iban-asen-d waya d ugur ameqqran i wid i d-yettnekkaren ḥemmlen aẓawan d wallalen-is, akken sya ɣer sdat ad d-uɣalen d imẓawanen, d inaẓuren. Amedya n wid n Usamar-anẓul n Bgayet, ilaq-asen ad ɛeddin akkin i Uweqqas, ɣef teɣzi n ddeqs n yikilumitren, neɣ i waɣir n Bgayet maḍi, akken ad afen, s tuɛert, adeg i yebɣa lxaṭer. Ad d-nesmekti d akken ula deg uɣerbaz tuqa ayendin tanga-a (matière), am wakken uqan wid iwumi d-tsaḥ. Deg tɣiwant n Ayt Smaɛel, i yeggugen s wazal n 65 n yikilumitren seg Bgayet, ttwalin yilemẓiyen i yemmalen ɣer uẓawan, yettwakkes-asen s tidet uzref, imi yal yiwen yufa ala netta i yenṭerren. « Win yebɣan ad yelmed lḥirfa, ha-t-an yella ulmas n Lberj n Mira, win yebɣan Internet, llan yisibiren, maca nekni i yebɣan aẓawan, ulac sanda ara nerr akken ad nelmed di temnaḍt-nneɣ ». D awal n yiwen n yilemẓi seg Ayt Smaɛel. Yelha ad d-nerr awellih belli, iseggasen-a ineggura kan, yella yenwa deg Ayt Smaɛel yiwen n urgaz ad isemmed asenfar n Uxxam n ulmad n uẓawan (Conservatoire) s yiselmaden d wayen ilaqen d allalen, maca ɣer taggara, yebra i ṭṭbel deg waman. « Ttxemmimeɣ ɣef usenfar-a seg waṭas-a. Maca ur kenniɣ ad yesmurres deg temnaḍt-nneɣ tamsedrart tamecṭuḥt ». Akka i iwala.
M. K.