Am waṭas n tddukkliwin n Tmurt, thegga-d tddukkla tadelsant Idles deg tɣiwant n Draɛ Lqaɛed, tadayra n Xerraṭa, yiwen n wahil s wazal-is i lmend n usfuggel d usmekti n Tefsut n yimaziɣen d Tefsut taberkant. D ahil i d-yettwaheggan deg teɣzi n wass n sed 21 yebrir sɣur tddukkla tilemẓit Idles i d-yennulfan melmi kan. Deg warmuden i d-yellan ihi deg uxxam n yilemẓiyen n temnaḍt-a, tella-d temzikkent n wallalen imensayen n zik. Yella-d daɣ usarag s usentel i yeqqnen ɣer Tefsut n yimaziɣen merra d unamek-is. Seg teswiɛt n keffu n usarag, teḍfer-d rreḥba n yisefra, ideg i d-ɛeddan kra n yimedyazen i tiwin n yisefra-nsen, abeɛda ɣef tummast d yidles. Syinna, ḥeḍren wid i d-yusan i tceqquft n umezgun, d usenɛet n kra n tfelwiyin n teklut. S waya i yekfa wahil i d-thegga tdukkla Idles i yebdan tettawi-d amaynut i taddart.
M. K.