Ad d-tili tezrigt tis mraw d semmus (15) n tfaska tagraɣlant “Ales-d taẓuri”, yettwassnen s “Raconte-Arts”, gar 19 alamma d 26 yulyu 2018, deg taddart n Tiferdoud, tamnadt i yewwin arraz amezwaru n taddart tazedgant deg tezrigt-is tis semmus (05), i d-yellan deg useggas iɛeddan.Yebda yakan uheggi i ttiɛad-agi adelsan ameqqran, sɣur tesqamut n taddart-agi n Tiferdoud akked tddukkliwin iqeddcen deg unnar di taddart-agi. Ad d-yili leqdic-agi ɣef teɣzi n tmanya wussan, imi ad yebdu s wudem unṣib ass n lexmis 19 yulyu 2018, ad yekfu ass n lexmis-nni sdat-s 26 yulyu. D tafaska i d-tsuddus yal aseggas tiddukkla n tẓuri n lwilaya n Tizi Uzzu, s tallelt n Useqqamu aɣerfan n Lwilaya (APW) n Tizi Uzzu, s lemɛawna n tddukkliwin akked teseqqamut n taddart ideg ara d-tili yal aseggas tfaska-agi. Deg tezrigt-agi tis 15, yetturaǧu ad d-yili wahil d anesbaɣur ɣef teɣzi n ddurt tadelsant. Ad ilint deg-s temsikniyin yemgaraden: taqendurt, idlisen, abernus, imuhal n ufus…atg. Ad ilin daɣen yisaragen, isura, uraren ama d wid n zik, ama d wid n tura. Ad d-tili, diɣ, tmenna n yisefra sɣur yimedyazen, asenzi s ubuddu sɣur yimura, timeɣriwin n ccna sɣur inaẓuren. Am wakken yetturaǧu turrart n waṭas n tmezgunin, d usuddes n ddeqs n temliliyin, d waṭas n leqdicat-nniḍen.Ɣef wakken i d-nnan, ad d-rzun ɣer tezrigt n useggas-agi, ma ulac maḍi 300 n yinaẓuren, tuget deg-sen d wid n tmurt n Lezzayer, am wakken daɣer ara d-rzun ddeqs-nniḍen seg tmura tiberraniyin, yecban: Fransa, Congo, Italie, Portugale, Espagne, Tunes, Surya, Lubnan, Palistine…atg. Ma d iswi ajejdan n tfaska-agi, d asnerni d unegmu n yidles amaziɣ d umaḍlan deg tmurt n Leqbayel, d asenɛet leṣnaf yemgaraden n tẓuri d tinḍi akked usebɣes n yinaẓuren d yinḍiyin, d uẓeṭṭa n tegmat d tdukli gar yigduden n umaḍal merra.
A. A